You would be faithful

You would be faithful

 

تم وفا نبھا لیتے

"ﭼﻠﯿﮟ ﻧﮧ ﺭﻭﺣﺎﻥ ﺑﮭﺎﺋﯽ ﺁﭖ ﺑﮭﯽ ﮨﻤﮩﺎﺭﮮ ﺳﺎﺗﮫ ﺗﺎﯾﺎ ﺟﺎﻥ ﮐﮯ ﮔﮭﺮ"۔ عنایہ کی ﭘﺎﻧﭽﻮﮞ بہنیں ﺭﻭﺣﺎﻥ ﮐﻮ ﮔﮭﯿﺮﮮ ﮨﻮﺋﮯ ﺑﯿﭩﮭﯽ ﺗﮭﯿﮟ.

 "ﯾﺎﺭ ﻣﯿﮟ ﮐﯿﺎ ﮐﺮﻭﮞ ﮔﺎ ﻭﮨﺎﮞ ﺗﻢ ﻟﻮﮒ ﺟﺎﻭ"۔ "ﻭﮨﺎﮞ ﮨﯿﮟ ﻧﺎﮞ ﻋﻠﯽﺑﮭﺎﺋﯽ، ﻋﺜﻤﺎﻥ ﺍﻭﺭ ﺑﻼﻭﻝ۔ﺁﭖ ﺑﻠﮑﻞ ﺗﻨﮓ ﻧﮩﯿﮟ ﮨﻮﻧﮕﮯ ﻭﯾﺴﮯ ﺑﮭﯽ ﻋﻠﯽ ﺑﮭﺎﺋﯽ ﺳﮯ ﺁﭖ ﮐﯽ ﺑﻨﺘﯽ ﮨﮯ۔" ﻋﻠﯿﺰﮮ ﺳﮯ ﭼﮭﻮﭨﯽ ﻣﺎﮦ ﺟﺒﯿﮟ ﻧﮯ ﺑﮩﺖ ﺍﺻﺮﺍ ﮐﺮ ﮐﮯ ﮐﮩﺎ اور تایا کے بیٹوں کے نام بھی گنوائے۔

 "ﭼﻠﯿﮟ ﻧﺎﮞ ﺭﻭﺣﺎﻥ ﺑﮭﺎﺋﯽ" ﺳﺐ ﺍﮎ ﺁﻭﺍﺯ ﺳﮯ ﺑﻮﻟﯿﮟ۔ "ﺍﻭﮐﮯ ﭨﮭﯿﮏ ﭼﻠﺘﺎ ﮨﻮﮞ". 

14 ﺍﮔﺴﺖ ﮐﯽ ﭼﮭﭩﯽتھی اور  ﺍﺗﻔﺎﻕ سے 14 اگست سے  ﭘﮩﻠﮯ ﺑﮭﯽ ﺍﮎ ﭼﮭﭩﯽ ﺁ ﺭﮨﯽ ﺗﮭﯽ ﺳﻮ ﺍﻥ ﺳﺐ ﻧﮯ ﮐﺮﺍﭼﯽ ﺟﺎﻧﮯ ﮐﺎ ﭘﺮﻭﮔﺮﺍﻡ ﺑﻨﺎ ﻟﯿﺎ۔ﺳﻮﺍﺋﮯ ﻋﻨﺎﯾﮧ ﮐﮯ ﺳﺐ ﺟﺎ ﺭﮨﮯ ﺗﮭﮯ۔

 ﺍﺭﺗﻀﯽ ﺻﺎﺣﺐ ﻧﮯ ﯾﮩﺎﮞ ﮐﮯ ﺗﻤﺎﻡ ﻣﻌﻤﻼﺕ ﮨﺎﺭﻭﻥ ﺻﺎﺣﺐ ﺍﻭﺭ ﺍﭘﻨﮯ ﺍﮎ ﺩﻭﺳﺖ ﮐﮯ ﺣﻮﺍﻟﮯ ﮐﺮ ﮐﮯ ﮐﺮﺍﭼﯽ ﻣﯿﮟ ﻓﯿﮑﭩﺮﯼ ﮐﮭﻮﻝ ﻟﯽ ﺗﮭﯽ۔

ﺍﺏ ﺍﻥ ﮐﺎ ﭘﺮﺍﻧﺎ ﺯﻣﺎﻧﮧ ﻧﮩﯿﮟ ﺭﮨﺎ ﺗﮭﺎ۔ﻧﺖ ﻧﺌﮯ ﻓﯿﺸﻦ ﺍﻭﺭ ﻣﻘﺎﺑﻠﮯ ﮐﯽ ﺑﮭﺮﻣﺎﺭ ﻧﮯ ﺍﻧﮭﯿﮟ ﺍﺱ

ﮐﺎﻡ ﮐﮯ ﻟﺌﮯ ﮐﺮﺍﭼﯽ ﺷﻔﭧ ﮨﻮﻧﮯ ﭘﺮ ﻣﺠﺒﻮﺭ ﮐﯿﺎ۔

"ﻋﻨﺎﯾﮧ ﺗﻢ ﮐﯿﻮﮞ ﻧﮩﯿﮟ ﺟﺎ ﺭﮨﯿﮟ"۔ ﺭﻭﺣﺎﻥ ﻧﮯ ﻋﻨﺎﯾﮧ ﮐﮯ ﺭﻭﻡ ﻣﯿﮟ ﺁ ﮐﺮ ﺍﮎ ﺩﻡ ﺳﻮﺍﻝ ﮐﯿﺎ۔ "ﻣﺠﮭﮯ ﻧﮩﯿﮟ ﺍﭼﮭﺎ ﻟﮕﺘﺎ ﮐﮩﯿﮟ ﺑﮭﯽ ﺟﺎﻧﺎ ﻣﺠﮭﮯ ﮔﮭﺮ ﻣﯿﮟ ﺭﮨﻨﺎ ﺍﭼﮭﺎ ﻟﮕﺘﺎ ﮨﮯ". ﻋﻨﺎﯾﮧ ﻧﮯ ﺻﺎﻑ ﮔﻮﺋﯽ ﺳﮯ ﺟﻮﺍﺏ ﺩﯾﺎ۔ 

"ﻋﻨﺎﯾﮧ ﭼﻠﻮ ﻧﺎﮞ ﻭﮦ ﺳﺐ ﻣﺠﮭﮯ ﺑﮭﯽ ﻟﮯ ﮐﺮ ﺟﺎ ﺭﮨﯽ ﮨﯿﮟ ﺍﻭﺭ ﺗﻢ ﻧﮩﯿﮟ ﮨﻮﮔﯽ ﺗﻮ ﻣﯿﮟ ﮐﯿﺎ ﮐﺮﻭﮞ

ﮔﺎ"۔

"ﺍﺭﮮ ﻭﮨﺎﮞ ﮐﺰﻥ ﮨﯿﮟ ﻧﺎﮞ ﻣﯿﺮﮮ ﻭﮦ ﺗﻤﮩﯿﮟ ﺑﻮﺭ ﻧﮩﯿﮟ ﮨﻮﻧﮯ ﺩﯾﻨﮕﮯ"۔عنایہ نے اپنی جان چھڑانے کےلئے کہا۔

 "ﻭﮦ ﺗﯿﻨﻮﮞ ﻣﺠﮫ ﺳﮯ ﭼﮭﻮﭨﮯ ﮨﯿﮟ ﺍﻭﺭ ﺗﻢ ﻧﮩﯿﮟ ﺟﺎﻭ ﮔﯽ ﺗﻮ ﻣﯿﮟ ﺍﭘﻨﮯ ﺁﭖ ﮐﻮ ﺍﮐﯿﻼ ﻣﺤﺴﻮﺱ ﮐﺮﻭﮞ ﮔﺎ". روحان نے بےچارگی سے کہا۔

 " ﺍﭼﮭﺎ ﭼﻠﯿﮟ ﭨﮭﯿﮏ ﮨﮯ ﺑﺲ ﻣﯿﮟ ﺍﭘﻨﮯ ﺍﮎ ﺩﻭ ﺳﻮﭦ ﺭﮐﮫ ﺩﻭﮞ"۔ ﻋﻨﺎﯾﮧ ﻧﮯ ﺭﺿﺎﻣﻨﺪ ﯾﻮﺗﮯ ﮨﻮﺋﮯ ﮐﮩﺎ ﮨﮭﺮ ﺍﮎ ﺩﻡ ﭘﻮﭼﮭﺎ "ﺗﻢ ﻧﮯ ﺍﭘﻨﮯ ﮐﭙﮍﮮ ﺭﮐﮭﮯ"۔ 

"ﻧﺎﮞ ﺟﻨﺎﺏ ﺗﻤﮩﺎﺭﮮ ﯾﻮﺗﮯ ﮨﻮﺋﮯ ﻣﺠﮭﮯ ﺍﭘﻨﯽ ﻓﮑﺮ ﮐﺮﻧﮯ ﮐﯽ ﮐﻮﺋﯽ ﺿﺮﻭﺭﺕ ﻧﮩﯿﮟ"۔ ﺭﻭﺣﺎﻥ ﻧﮯ ﺍﺳﮯ ﺩﯾﮑﮭﺘﮯ ﮨﻮﺋﮯ ﻻﭘﺮﻭﺍﮦ ﺳﮯ ﺍﻧﺪﺍﺯ ﻣﯿﮟ ﮐﮩﺎ۔

ﮐﺮﺍﭼﯽ ﭘﮩﻨﭻ ﮐﺮ ﺳﺐ ﺳﮯ ﻣﻞ ﮐﺮ ﺑﮩﺖ ﺍﭼﮭﺎ ﻟﮕﺎ۔ ﺗﯿﻨﻮﮞ ﮐﺰﻥ ﺗﺎﺋﯽﺟﺎﻥ ﺍﻭﺭ ﺗﺎﯾﺎﺟﺎﻥ ﺑﮯﺣﺪ ﺧﻮﺵ ﺗﮭﮯ۔ ﺳﺐ ﻧﮯ ﻣﻞ ﮐﺮ ﺩﻭﭘﮩﺮ ﮐﻮ ﮔﭗ ﺷﭗ ﮐﯽ۔

ﺭﻭﺯﮦ ﺗﮭﺎ ﺳﻮ ﮐﮭﺎﻧﮯ ﭘﯿﻨﮯ ﮐﺎ ﮐﻮﺋﯽ ﺳﯿﻦ ﻧﮩﯿﮟ ﺗﮭﺎ۔

"ﺗﺎﺋﯽ ﺟﺎﻥ ﻣﺠﮭﮯ ﺗﮭﮑﻦ ﺳﯽ ﻣﺤﺴﻮﺱ ﮨﻮ ﺭﮨﯽ ﮨﮯ ﻣﯿﮟ ﺗﮭﻮﮌﯼ ﺩﯾﺮ ﺳﻮﻧﺎ ﭼﺎﮨﺘﯽ ﮨﻮﮞ" ﻋﻨﺎﯾﮧ ﻧﮯ ﻋﺎﻟﯿﮧ ﺑﯿﮕﻢ ﮐﻮ ﻣﺨﺎﻃﺐ ﮨﻮﺗﮯ ﮨﻮﺋﮯ ﮐﮩﺎ۔

 "ﯾﮩﺎﮞ ﺳﺐ ﺍﮎ ﮨﻨﮕﺎﻣﮧ ﮐﮭﮍﮮ ﮐﯿﺌﮯ ﮨﻮﺋﮯ ﮨﯿﮟ ﺗﻢ یوں ﮐﺮﻭ ﺍﻭﭘﺮ ﻭﺍﻟﮯ ﭘﻮﺭﺷﻦ ﻣﯿﮟ ﺟﺎﮐﺮ ﺳﻮ ﺟﺎﻭ"۔ ﻋﺎﻟﯿﮧ ﺑﯿﮕﻢ ﻧﮯ ﺍﺳﮯ ﮐﺎﻡ ﻭﺍﻟﯽ ﻣﺎﺳﯽ ﮐﮯ ﺳﺎﺗﮫ ﺍﻭﭘﺮ ﺑﮭﯿﺞ ﺩﯾﺎ۔ ﺑﺴﺘﺮ ﭘﺮ ﻟﯿﭩﺘﮯ ﮨﯽ ﻋﻨﺎﯾﮧ ﺑﮯﺳﺪﮪ ﺳﯽ ﮨﻮ ﮐﺮ ﺳﻮ ﮔﺌﯽ۔ ﺍﺑﮭﯽ ﺳﻮﺋﮯ ﺍﺳﮯ ﭘﺘﺎ ﻧﮩﯿﮟ ﮐﺘﻨﺎ ﭨﺎﺋﻢ ﮨﻮﺍ ﺗﮭﺎ ﮐﮧ ﺍﺳﮑﯽ ﺁﻧﮑﮫ ﮐﺴﯽ ﮐﮯ ﺯﻭﺭ ﺳﮯ ﺑﻮﻟﻨﮯ ﭘﺮ ﮐﮭﻠﯽ ﺗﮭﯽ۔ ﺍﻟﻔﺎﻅ ﺳﻤﺠﮫ ﺳﮯ ﺑﺎﯾﺮ ﺗﮭﮯ ﭘﺮ ﺁﻭﺍﺯ ﻧﯿﭽﮯ ﻭﺍﻟﮯ ﭘﻮﺭﺷﻦ ﺳﮯ ﺁﺋﯽ ﺗﮭﯽ۔ ﺍﺱ ﻧﮯ ﺍﭘﻨﮯ ﺩﻣﺎﻍ ﮐﻮ ﺣﺎﺿﺮ ﮐﺮﻧﮯ ﮐﯽ ﮐﻮﺷﺶ ﮐﯽ ﮐﯿﻮﻧﮑﮧ ﻭﮦ ﺍﺑﮭﯽ ﺑﮭﯽ ﻧﯿﻨﺪ ﮐﮯ ﻏﻠﺒﮯ ﻣﯿﮟ ﺗﮭﯽ۔ﺍﭨﮫ ﮐﺮ ﺟﺐ ﻧﯿﭽﮯ ﺁﺋﯽ ﺗﻮ ﻭﮨﺎﮞ ﺍﮎ ﺳﻨﺎﭨﺎ ﺗﮭﺎ۔ﺭﻭﺣﺎﻥ ﮐﻮ ﺍﺱ ﻧﮯ ﻏﺼﮯ ﺳﮯ ﺑﺎﮨﺮ ﺟﺎﺗﮯ ﮨﻮﺋﮯ ﺩﯾﮑﮭﺎ۔ ﺟﺒﮑﮧ ﺗﺎﺋﯽ ﺟﺎﻥ ﺍﺭﺗﻀﯽ ﺻﺎﺣﺐ ﺳﮯ ﮐﮩﮧ ﺭﮨﯽ ﺗﮭﯿﮟ.

"ﺁﭖ ﮐﻮ ﮐﯿﺎ ﺿﺮﻭﺭﺕ ﺍﺱ ﮐﮯ ﺑﺎﭖ ﮐﮯ ﺑﺎﺭﮮ ﻣﯿﮟ ﮐﭽﮫ ﮐﮩﻨﮯ ﮐﯽ۔ ﻣﮩﻤﺎﻥ ﺁﯾﺎ ﮨﻮﺍ ﮨﮯ ﮨﻤﮩﺎﺭﮮ ﮔﮭﺮ"۔ ﻋﻨﺎﯾﮧ ﺑﮩﻨﻮﮞ ﮐﮯ ﭘﺎﺱ ﺁﺋﯽ ﺗﻮ ﻭﮦ ﺍﮎ ﺩﻡ ﺍﺱ ﺳﮯ ﺑﻮﻟﯿﮟ "ﺗﺎﯾﺎﺟﺎﻥ ﻧﮯ ﭘﮩﻠﮯ ﻣﺬﺍﻕ ﮨﯽ ﻣﺬﺍﻕ ﻣﯿﮟ ﻣﺎﻣﻮﮞ ﺟﺎﻥ ﮐﯽ ﺟﻮﺍﻧﯽ ﮐﯽ ﺑﺎﺗﯿﮟ ﮐﯿﮟ ﺍﻭﺭ ﭘﮭﺮ ﮐﮩﻨﮯ ﻟﮕﮯ ﺗﻤﮩﺎﺭﺍ ﺑﺎﭖ ﺗﮭﺎ ﺑﮩﺖ ﺁﻭﺍﺭﮦ ﺍﻭﺭ ﻋﯿﺎﺵ"۔

 ﺭﻭﺣﺎﻥ ﺑﮭﺎﺋﯽ ﭘﮩﻠﮯ ﺗﻮ ﺳﺐ ﺧﺎﻣﻮﺷﯽ ﺳﮯ ﺳﻨﺘﮯ ﺭﮨﮯ ﻣﮕﺮ ﺟﺐ ﺗﺎﯾﺎﺟﺎﻥ ﻧﮯ ﻣﺎﻣﻮﮞ ﮐﻮ ﺁﻭﺍﺭﮦ ﺍﻭﺭ ﻋﯿﺎﺵ ﮐﮩﺎ ﺗﻮ ﺭﻭﺣﺎﻥ ﺑﮭﺎﺋﯽ ﺍﮎ ﺩم ﻏﺼﮯ ﻣﯿﮟ ﺁﮔﺌﮯ ﺍﻭﺭ ﺗﺎﯾﺎﺟﺎﻥ ﮐﻮ ﮐﮩﺎ ﮐﮧ ﭘﻠﯿﺰ ﺍﺱ ﮐﮯ ﺑﺎﭖ ﮐﮯ ﺑﺎﺭﮮ ﻣﯿﮟ ﮐﻮﺋﯽ ﺑﺎﺕ ﻧﮧ ﮐﮩﯿﮟ۔

ﺍﺏ ﭘﺘﺎ ﻧﮩﯿﮟ ﮐﮩﺎﮞ ﮔﺌﮯ ﮨﯿﮟ ﮨﻢ ﻧﮯ ﺍﺱ ﺳﮯ ﭘﮩﻠﮯ ﺭﻭﺣﺎﻥ ﺑﮭﺎﺋﯽ ﮐﻮ ﺍﺗﻨﮯ ﻏﺼﮯ ﻣﯿﮟ ﻧﮩﯿﮟ ﺩﯾﮑﮭﺎ"۔

ﻣﺎﺣﻮﻝ ﺍﮎ ﺩﻡ ﺑﮩﺖ ﺳﻨﺠﯿﺪﮦ ﮨﻮ ﮔﯿﺎ۔ ﻋﻠﯽ ﺭﻭﺣﺎﻥ ﮐﮯ ﭘﯿﭽﮭﮯ ﺑﺎﮨﺮ ﻧﮑﻼ۔ ﺷﺎﻡ ﮐﮯ ﮨﺎﻧﭻ ﺑﺞ ﺭﮨﮯ ﺗﮭﮯ ﺟﺐ ﺭﻭﺣﺎﻥ ﻋﻠﯽ ﮐﮯ ﺳﺎﺗﮫ ﮔﮭﺮ ﻭﺍﭘﺲ ﺁﯾﺎ۔ ﺗﺎﯾﺎﺟﺎﻥ ﺍﮎ ﺩﻡ ﺍﺳﮑﯽ ﻃﺮﻑ ﺑﮍﮬﮯ ﺍﻭﺭ ﺍﺳﮯ ﺑﺎﺯﻭﮞ ﮐﮯ ﺣﻠﻘﮯ ﻣﯿﮟ ﺍﻧﺪﺭ ﻟﮯ ﺁﺋﮯ۔ﺍﺱ ﻧﮯ ﺑﮭﯽ ﺍﭘﻨﮯ ﺁﭖ ﮨﺮ ﻗﺎﺑﻮ ﭘﺎ ﻟﯿﺎ ﺗﮭﺎ ﻓﻠﺤﺎﻝ۔

"ﺍﭼﮭﺎ ﺗﺎﯾﺎﺟﺎﻥ ﺍﺏ ﺍﺟﺎﺯﺕ ﺩﯾﮟ ﮨﻢ ﻧﮯ ﺟﺎﻧﺎ ﮨﮯ۔" ﺳﺎﺕ ﺑﺠﮯ ﮐﮯ ﻗﺮﯾﺐ ﺭﻭﺣﺎﻥ ﺍﭨﮫ ﮐﮭﮍﺍ ﮨﻮﺍ۔ "ﻣﯿﺮﺍ ﮐﻞ ﮐﻤﭙﯿﻮﭨﺮ ﮐﻮﺭﺱ ﮐﺎ ﭨﯿﺴﭧ ﮨﮯ ﻣﯿﮟ ﺑﮭﻮﻝ ﮔﯿﺎ ﺗﮭﺎ"۔

 " ﺍﺭﮮ ﺑﯿﭩﺎ ﺁﺝ ﮨﯽ ﺗﻮ ﺁﺋﮯ ہو ﺍﮎ ﺩﻭ ﺩﻥ ﺭﮎ ﺟﺎﺗﮯ ﺳﺐ ﺳﺎﺗﮫ ﺟﺎﺗﮯ"۔ ﺍﺭﺗﻀﯽ ﺻﺎﺣﺐ ﻧﮯ ﺭﻭﺣﺎﻥ ﮐﻮ ﺩﯾﮑﮭﺘﮯ ﮨﻮﺋﮯ ﮐﮩﺎ۔

"ﻧﮩﯿﮟ ﺗﺎﯾﺎﺟﺎﻥ ﺍﮔﺮ ﭨﯿﺴﭧ ﻧﺎﮞ ﺩﯾﺎ ﺗﻮ ﻭﮦ ﻣﯿﺮﯼ ﺳﺎﺭﯼ ﮐﺎﺭﮔﺮﺩﮔﯽ ﮐﻮ ﺧﺘﻢ ﮐﺮ ﺩﯾﮟ ﮔﮯ۔ ڈﯾﮍﮪ ﻣﺎﮦ ﮨﻮﮔﯿﺎ ﺗﻮ ﻣڈ ﻣﯿﮟ ﭨﯿﺴﭧ ﻟﮯ ﺭﮨﮯ ﮨﯿﮟ۔ ﭼﻠﻮ ﻋﻨﺎﯾﮧ ﭼﻠﯿﮟ۔" ﺭﻭﺣﺎﻥ ﮐﯽ ﺑﺎﺕ ﺳﻦ ﮐﺮ ﻋﻨﺎﯾﮧ ﺣﯿﺮﺍﻥ ﻭ ﮨﺮﯾﺸﺎﻥ ﺍﺳﮯ ﺩﯾﮑﮭﻨﮯ ﻟﮕﯽ۔ 

"ﮐﯿﻮﮞ ﺑﮭﺊ ﺗﻤﮩﺎﺭﯼ ﺑﯿﺴﭧ ﻓﺮﯾﻨڈ ﮐﯽ ﺳﺴﭩﺮ ﮐﯽ ﺷﺎﺩﯼ ﺟﻮ ﮨﮯ ﺑﮭﻮﻝ ﮔﺌﯿﮟ"۔

 ﻋﻨﺎﯾﮧ ﭘﮩﻠﯽ ﺩﻓﻌﮧ ﺭﻭﺣﺎﻥ ﮐﻮ ﺍﺱ ﻗﺪﺭ ﺻﻔﺎﺋﯽ ﺳﮯ ﺟﮭﻮﭦ ﺑﻮﻟﺘﺎ ﺩﯾﮑﮫ ﺭﮨﯽ ﺗﮭﯽ ﺍﺳﮑﯽ ﺳﻤﺠﮫ ﻣﯿﮟ ﮨﯽ ﻧﮩﯿﮟ ﺁ ﺭﮨﺎ ﺗﮭﺎ ﮐﮧ ﻭﮦ ﮐﯿﺎ ﺑﻮﻟﮯ ﮐﯿﺎ ﻧﮧ ﺑﻮﻟﮯ۔

 "ہاﮞ ﻧﺎﮞ ﻋﻨﺎ ﺁﭖ ﻧﮯ ﺍﻭﺭ روحان ﺑﮭﺎﺋﯽ ﻧﮯ ﻭﺍﭘﺲ ﺟﺎﻧﺎ ﺗﮭﺎ ﻧﺎﮞ ﺻﺒﺢ۔ ﺍﺏ ﺭﻭﺣﺎﻥ ﺑﮭﺎﺋﯽ ﮐﻮ ﭨﯿﺴﭧ ﯾﺎﺩ ﺁ ﮔﯿﺎ ﺗﻮ ﺍﺱ ﮐﯽ ﭘﺮﯾﮑﺴﭩﺲ ﺑﮭﯽ ﮐﺮﻧﯽ ﮨﮯ ﺍﻧﮭﻮﮞ ﻧﮯ ﮨﻢ ﺩﻭ ﺗﯿﻦ ﺩﻥ ﺑﻌﺪ ﻋﻠﯽ ﮐﻮ ﻟﮯ ﮐﺮ ﺁ ﺟﺎﺋﯿﮟ ﮔﯽ۔" ﻋﻠﯿﺰﮮ ﺭﻭﺣﺎﻥ ﮐﮯ ﻏﺼﮯ ﮐﻮ ﺩﯾﮑﮫ ﭼﮑﯽ ﺗﮭﯽ ﺍﻭﺭ ﺳﻤﺠﮫ ﮔﺌﯽ ﺗﮭﯽ ﻭﮦ ﺍﺏ ﯾﮩﺎﮞ ﺭﮨﻨﺎ ﻧﮩﯿﮟ ﭼﺎﮨﺘﺎ ﭘﺮ ﺍﻧﮭﻮﮞ ﻧﮯ ﻋﻨﺎ ﮐﺎ ﻧﺎﻡ ﺑﮭﯽ ﮐﯿﻮﮞ ﻟﯿﺎ ﯾﮧ ﺑﺎﺕ ﻭﮦ ﺑﮭﯽ ﺳﻤﺠﮭﻨﮯ ﺳﮯ ﻗﺎﺻﺮ ﺗﮭﯽ ﻣﮕﺮ ﺳﺐ ﮐﮯ ﺳﺎﻣﻨﮯ ﺑﺎﺕ ﮐﻮ ﺳﻨﺒﮭﺎﻟﻨﺎ ﺑﮭﯽ ﺗﮭﺎ۔ ﻋﻨﺎ ﺳﮯ ﺍﺳﮯ ﮐﻮﺋﯽ ﺗﻮﻗﻊ ﻧﮩﯿﮟ ﺗﮭﯽ ﻭﮦ ﺗﻮ ﺑﺲ ﺣﯿﺮﺍﻧﮕﯽ ﺳﮯ ﺭﻭﺣﺎﻥ ﮐﻮ ﺩﯾﮑﮭﮯ ﺟﺎ ﺭﮨﯽ ﺗﮭﯽ۔

"ﺗﻢ ﭼﻞ ﺭﮨﯽ ﯾﻮ ﯾﺎ ﻧﮩﯿﮟ ﻣﯿﺮﮮ ﺳﺎﺗﮫ۔" ﻋﻨﺎﯾﮧ ﮐﻤﺮﮦ ﻣﯿﮟ ﺁﺋﯽ ﺗﻮ ﺭﻭﺣﺎﻥ ﺑﮭﯽ ﺍﺱ ﮐﮯ ﭘﯿﭽﮭﮯ ﺁ ﮔﯿﺎ۔ "ﯾﮧ ﮐﯿﺎ ﺑﮯﮨﻮﺩﮔﯽ ﮨﮯ ﺭﻭﺣﺎﻥ؟ ﻣﯿﮟ ﺁﻧﺎ ﻧﮩﯿﮟ ﭼﺎﮦ ﺭﯾﯽ ﺗﮭﯽ ﺗﻢ ﻧﮯ ﺯﺑﺮﺩﺳﺘﯽ ﺗﯿﺎﺭ ﮐﯿﺎ ۔ﺍﺏ ﺁﺋﮯ ﭼﻨﺪ ﮔﮭﻨﭩﮯ ﮔﺰﺭﮮ ﺗﻢ ﻭﺍﭘﺲ ﭼﻠﻨﮯ ﮐﺎ ﮐﮩﮧ ﺭﮨﮯ ﮨﻮ۔ ﻣﯿﮟ ﺗﻤﮩﯿﮟ ﻣﺬﺍﻕ ﻟﮓ ﺭﮨﯽ ﮨﻮﮞ ﮐﯿﺎ"۔

ﺭﻭﺣﺎﻥ ﻋﻨﺎﯾﮧ ﮐﯽ ﺑﺎﺕ ﺳﻦ ﮐﺮ ﺍﮎ ﺩﻡ ﮨﻮﺵ ﻣﯿﮟ ﺁﯾﺎ ﮐﮧ ﺍﺱ ﻧﮯ ﮔﮭﺮ ﺳﮯ ﺑﺎﮨﺮ ﻏﺼﮯ ﻣﯿﮟ ﺟﺎﺗﮯ ﮨﻮﺋﮯ ﺑﮯﺍﺧﯿﺎﺭﯼ ﻣﯿﮟ ﺩﻭ ﭨﮑﭧ ﮐﯿﻮﮞ ﻟﺌﮯ ﺟﺒﮑﮧ ﻭﮦ ﺍﻥ ﺳﺐ ﮐﮯ ﺳﺎﺗﮫ ﺁﯾﺎ ﺗﮭﺎ ﺍﻭﺭ ﺍﮔﺮ ﻟﯿﻨﮯ ﺑﮭﯽ ﺗﮭﮯ ﺗﻮ ﺳﺐ ﮐﮯ ﻟﯿﻨﮯ ﺗﮭﮯ ﺻﺮﻑ ﻋﻨﺎﯾﮧ ﮐﮯ ﻟﺌﮯ ﮐﯿﻮﮞ ﺍﻭﺭ ﺑﺎﮨﺮ ﺳﺐ ﮐﮯ ﺳﺎﻣﻨﮯ ﻋﻨﺎﯾﮧ کو ﺍﭘﻨﮯ ﺳﺎﺗﮫ ﻟﮯ ﺟﺎﻧﮯ ﮐﮯ ﻟﺌﮯ ﺑﮩﺎﻧﮧ ﮐﯿﻮﮞ ﺑﻨﺎﯾﺎ۔

"ﻣﺠﮭﮯ ﻧﮩﯿﮟ ﭘﺘﺎ ﻋﻨﺎ ﺑﺲ ﺑﮯﺍﺧﺘﯿﺎﺭی ﻣﯿﮟ ﺳﺐ ﮐﯿﺎ ﺍﻭﺭ ﮨﺎﮞ ﻣﯿﺮﺍ ﭨﯿﺴﭧ ﮨﮯ ﻧﺎﮞ ﮐﻞ ﺍﻭﺭ ﺗﻢ ﻧﮧ ﮨﻮﺋﯿﮟ ﺗﻮ ﻣﺠﮭﮯ ﭼﺎﺋﮯ ﮐﻮﻥ ﻻ ﮐﺮﺩﮮ ﮔﺎ۔ﺻﺒﺢ ﺭﻭﺯﮦ ہوﮔﺎ ﺗﻮ ﺗﯿﺎﺭﯼ ﺁﺝ ﺭﺍﺕ ﮐﻮ ﮨﯽ ﮐﺮﻭﮞ ﮔﺎ"۔ ﺭﻭﺣﺎﻥ ﻧﮯ ﺍﺱ ﮐﺎ ﺧﺮﺍﺏ ﻣﻮڈ ﺩﯾﮑﮫ ﮐﺮ ﭨﯿﺴﭧ ﻭﺍﻟﮯ ﺑﮩﺎﻧﮯ ﮐﻮ ﺑﺮﻗﺮﺍﺭ ﺭﮐﮭﺎ۔ ﺭﺍﺕ ﮐﮯ ﺍﯾﮏ ﺑﺞ ﺭﮨﮯ ﺗﮭﮯ ﺟﺐ ﯾﮧ ﺩﻭﻧﻮﮞ ﺗﮭﮑﮯ ہاﺭﮮ ﮔﮭﺮ ﭘﮩﻨﭽﮯ۔ ﻃﯿﺒﮧﺑﯿﮕﻢ ﻧﮯ ﺣﯿﺮﺍﻧﮕﯽ ﺳﮯ ﺍﻧﮭﯿﮟ ﺩﯾﮑﮭﺘﮯ ﮨﻮﺋﮯ ﮨﻮﭼﮭﺎ "ﺳﺐ ﺧﯿﺮ ﮨﮯ"۔

 " ہاﮞ ﭘﮭﭙﻮ ﺑﺲ ﮐﻞ ﻣﯿﺮﺍ ﭨﯿﺴﭧ ﺗﮭﺎ ﺍﻭﺭ ﻣﺠﮭﮯ ﻻﺯﻣﯽ ﺁﻧﺎ ﺗﮭﺎ ﺗﻮ ﻋﻨﺎﯾﮧ ﻧﮯ ﺑﮭﯽ ﮐﮩﺎ ﮐﮧ ﻣﯿﮟ ﺑﮭﯽ ﺳﺎﺗﮫ ﭼﻠﺘﯽ ﮨﻮﮞ"۔ روحان نے جلدی سے اپنی پھپو کو جواب دیا کہ کہیں عنایہ نہ بول دے کچھ۔

"ﮨﺎﮞ ﯾﮧ ﺭﮨﺘﯽ ﮐﮩﺎﮞ ﯾﮯ ﮐﮩﯿﮟ ۔ﻣﯿﮟ ﺑﮭﯽ ﮐﺒﮭﯽ ﮐﮩﯿﮟ ﺳﺎﺗﮫ ﻟﮯ ﺟﺎﻭﮞ ﺗﻮ ﺍﺱ ﮐﯽ ﯾﮩﯽ ﺭﭦ ﮨﻮﺗﯽ ﮨﮯ ﺍﻣﯽ ﮔﮭﺮ ﮐﺐ ﺟﺎﻧﺎ ﮨﮯ" ﻋﻨﺎﯾﮧ ﭼﭗ ﭼﺎﭖ ﮐﮭﮍﯼ ﺭﻭﺣﺎﻥ ﮐﮯ ﺟﮭﻮﭦ پر ﺟﮭﻮﭦ ﺳﻦ ﺭﮨﯽ ﺗﮭﯽ۔ﺍﺱ ﻧﮯ ﻧﺎﺭﺍﺿﮕﯽ ﺳﮯ ﻣﺎﮞ ﮐﻮ ﮐﮩﺎ " ﺍﻣﯽ ﺻﺒﺢ ﺭﻭﺣﺎﻥ ﮐﺎ ﭨﯿﺴﭧ ﮨﮯ ﺁﭖ ﻭﯾﺴﮯ ﺑﮭﯽ ﺳﺤﺮﯼ ﺗﮏ ﺟﺎﮔﺘﯽ ﮨﯽ ﮨﯿﮟ ﺍﺳﮯ ﭼﺎﺋﮯ ﺑﻨﺎ ﺩﯾﺠﺌﮯ ﮔﺎ۔ﻣﯿﮟ ﺳﻮﻧﮯ ﺟﺎ ﺭﮨﯽ ﮨﻮﮞ"۔

 ﻋﻨﺎﯾﮧ ﮐﻮ ﺍﺣﺴﺎﺱ ﺑﮭﯽ ﻧﮧ ﮨﻮﺍ ﮐﮧ ﻧﺎﺭﺍﺿﮕﯽ ﻣﯿﮟ ﺑﮭﯽ ﻭﮦ ﺭﻭﺣﺎﻥ ﮐﯽ ﻓﮑﺮ ﮐﺮ ﮔﺌﯽ ﮨﮯ۔ﺍﻭﺭ ﯾﮩﯽ ﺑﺎﺕ ﺭﻭﺣﺎﻥ ﮐﻮ ﺳﺮﺷﺎﺭ ﺳﺎ ﮐﺮ ﮔﺌﯽ ﮐﮧ ﺧﻔﺎ ﮨﻮ ﮐﺮ ﺑﮭﯽ ﻋﻨﺎﯾﮧ ﺍﺳﮑﮯ ﻟﺌﮯ ﮐﺘﻨﯽ ﺣﺴﺎﺱ ﮨﮯ۔

ﺭﻭﺣﺎﻥ ﻓﻠﺤﺎﻝ ﺍﭘﻨﮯ ﺟﺬﺑﺎﺕ ﮐﻮ ﺳﻤﺠﮭﻨﮯ ﺳﮯ ﻗﺎﺻﺮ ﺗﮭﺎ ﮐﯿﻮﻧﮑﮧ ﻋﻨﺎﯾﮧ ﺍﺳﮯ ﺍﮎ ﺑﮍﮮ ﺑﮭﺎﺋﯽ ﺟﯿﺴﺎ ﻣﻘﺎﻡ ﺩﮮ ﺭﮨﯽ ﺗﮭﯽ ﺣﺎﻻﻧﮑﮧ ﺩﻭﻧﻮﮞ ﻣﯿﮟ ﺑﺲ ﺩﺱ ﻣﺎﮦ ﮐﺎ ﻓﺮﻕ ﺗﮭﺎ۔

ﭼﮭﭩﯽ ﮨﻮﻧﮯ ﮐﯽ ﻭﺟﮧ ﺳﮯ ﻋﻨﺎﯾﮧ ﺻﺒﺢ ﻟﯿﭧ ﺍﭨﮭﯽ ۔ﺭﻣﻀﺎﻥ ﻣﯿﮟ ﻭﯾﺴﮯ ﺑﮭﯽ ﺻﺒﺢ ﮐﺎ ﭨﺎﺋﻢ ﺳﻮ ﮐﺮ ﮨﯽ ﮔﺰﺭﺗﺎ ﮨﮯ۔ ﻭﮦ ﺭﻭﻡ ﺳﮯ ﺑﺎﮨﺮ ﺁﺋﯽ ﺗﻮ ﺍﻣﯽ ﮐﻮ ﻗﺮﺁﻥ ﭘﺎﮎ ﭘﮍﮬﺘﮯ ﮨﻮﺋﮯ ﭘﺎﯾﺎ۔

 "ﺍﻣﯽ ﺁﭖ ﻧﮯ ﺭﻭﺣﺎﻥ ﮐﻮ ﭼﺎﺋﮯ ﺑﻨﺎ ﮐﺮ ﺩﯼ ﺭﺍﺕ ﮐﻮ ﺍﺱ ﻧﮯ ﺗﯿﺎﺭﯼ ﮐﺮﻧﯽ ﺗﮭﯽ"۔

 "ﻧﮩﯿﮟ ﺑﯿﭩﺎ ﺍﺱ ﻧﮯ ﻣﻨﻊ ﮐﺮ ﺩﯾﺎ ﺗﮭﺎ ﮐﮧ ﺍﺑﮭﯽ ﺑﮩﺖ ﺗﮭﮑﺎ ﮨﻮﺍ ﮨﻮﮞ۔ ﺳﺤﺮﯼ ﺗﮏ ﺳﻮ ﺟﺎﺗﺎ ﮨﻮﮞ ﺍﺱ ﮐﮯ ﺑﻌﺪ ﺗﯿﺎﺭﯼ ﮐﺮﻟﻮﮞ ﮔﺎ"۔۔

ﺳﺤﺮﯼ ﺗﮏ ﻋﻨﺎﯾﮧ ﮐﺎ ﻏﺼﮧ ﮐﻢ ﻧﮩﯿﮟ ﮨﻮﺍ ﺗﮭﺎ ﺳﻮ ﺍﺱ ﻧﮯ ﻧﮧ ﺭﻭﺣﺎﻥ ﺳﮯ ﮐﻮﺋﯽ ﺑﺎﺕ ﮐﯽ ﻧﮧ ﮐﺴﯽ ﺍﻭﺭ ﺳﮯ ﺳﺤﺮﯼ ﺧﺘﻢ ﮐﺮﮐﮯ ﻓﻮﺭﺍ ﺍﭘﻨﮯ ﺭﻭﻡ ﻣﯿﮟ ﭼﻠﯽ ﮔﺌﯽ. ﻋﻨﺎﯾﮧ ﺭﻭﺣﺎﻥ ﮐﮯ ﺭﻭﻡ ﻣﯿﮟ ﮔﺌﯽ ﺗﻮ ﻭﮦ ﺑﮩﺖ ﻣﺰﮮ ﺳﮯ ﺳﻮ ﺭﮨﺎ ﺗﮭﺎ۔ ﻋﻨﺎﯾﮧ ﻧﮯ ﺍﺳﮯ ﺍﻭﺍﺯ ﺩﯼ کہ ﺍﭨﮭﻮ ﭨﯿﺴﭧ ﮨﮯ ﭼﺎﺭ ﺑﺠﮯ ﺟﺎﻧﺎ ﮨﮯ ﺗﮭﻮﮌﯼ ﺍﻭﺭ ﭘﺮﯾﮑﺴﭩﺲ ﮐﺮ ﻟﻮ۔ ﻋﻨﺎﯾﮧ ﺟﺘﻨﯽ ﺍﻭﺍﺯﯾﮟ ﺩﮮ ﺭﮨﯽ ﺗﮭﯽ ﺭﻭﺣﺎﻥ ﺍﺗﻨﺎ ﮨﯽ ﭼﺎﺩﺭ ﮐﻮ ﻟﭙﯿﭧ ﮐﺮ ﺳﻮ ﺟﺎﺗﺎ۔ ﺁﺧﺮ ﺗﻨﮓ ﺁ ﮐﺮ ﻋﻨﺎﯾﮧ ﺭﻭﺣﺎﻥ ﮐﻮ ﺍﺱ ﮐﮯ ﮐﻨﺪﮬﮯ ﺳﮯ ﮨﻼ ﮐﺮ ﺟﮕﺎﯾﺎ ۔"ﺍﺏ ﺁﭨﮫ ﺑﮭﯽ ﺟﺎﻭ ﺭﻭﺣﺎﻥ ﺁﺝ ﭨﯿﺴﭧ ﮨﮯ ﺗﻤﮩﺎﺭﺍ".

 "ﮐﻮﻧﺴﺎ ﭨﯿﺴﭧ ﻣﯿﺮﺍ ﮐﻮﺋﯽ ﭨﯿﺴﭧ ﻧﮩﯿﮟ ﺁﺝ" ﺭﻭﺣﺎﻥ ﻧﮯ ﻧﯿﻨﺪ ﺳﮯ ﺑﮭﺮﭘﻮﺭ ﺁﻭﺍﺯ ﻣﯿﮟ ﺑﺘﺎﯾﺎ۔ "ﭘﮭﺮ ﺗﻢ ﻧﮯ ﮐﻞ ﺟﻮ ﮐﭽﮫ ﮐﮩﺎ ﻭﮦ"۔ ﻋﻨﺎﯾﮧ ﻧﮯ ﺻﺪﻣﮯ ﺳﮯ ﺑﮭﺮﭘﻮﺭ ﺁﻭﺍﺯ ﻣﯿﮟ ﭘﻮﭼﮭﺎ۔

"ﻭﮦ ﺟﮭﻮﭦ ﺑﻮﻻ ﺗﮭﺎ ﺁﻧﮯ ﮐﮯ ﻟﺌﮯ"۔ ﺭﻭﺣﺎﻥ ﮐﻮ ﺍﻧﺪﺍﺯﮦ ﻧﮩﯿﮟ ﺗﮭﺎ ﻧﯿﻨﺪ ﻣﯿﮟ ﺑﻮﻟﮯ ﺍﻟﻔﺎﻅ ﺍﺱ ﮐﯽ ﺷﺎﻣﺖ ﮐﮯ ﻟﺌﮯ ﮐﺎﻓﯽ ﺗﮭﮯ۔ ﮐﻤﺮﮦ ﮐﯽ ﺧﺎﻣﻮﺷﯽ ﺭﻭﺣﺎﻥ ﮐﻮ ﻣﻄﻤﺌﻦ ﮐﺮ ﮔﺌﯽ ﮐﮧ ﻋﻨﺎﯾﮧ ﺟﺎ ﭼﮑﯽ ﮨﮯ ﺍﻭﺭ ﯾﮧ ﺍﺱ ﮐﺎ ﻭﮨﻢ ﺛﺎﺑﺖ ﮨﻮﺍ۔ ﻋﻨﺎﯾﮧ ﻧﮯ ﻏﺼﮯ ﺳﮯ ﺑﯿڈ ﮐﯽ ﺳﺎﺋڈ ﭨﯿﺒﻞ ﭘﺮ ﭘﮍﮮ ﭘﺎﻧﯽ ﺳﮯ ﺑﮭﺮﮮ ﺟﮓ ﮐﻮ ﺍﭨﮭﺎﯾﺎ ﺍﻭﺭ ﭘﻮﺭﺍ ﺟﮓ ﺭﻭﺣﺎﻥ ﭘﺮ ﺍﻧڈﯾﻞ ﮐﺮ ﺑﻮﻟﯽ " ﯾﮧ ﻟﻮ ﺍﻭﺭ ﺍﺏ ﺻﯿﺤﯿﺢ ﻧﯿﻨﺪ ﺳﻮﻧﺎ۔

 ﺭﻭﺣﺎﻥ ﺍﺱ ﺁﻓﺘﺎﺩ ﺳﮯ ﺍﮎ ﺩﻡ ﮔﺒﮭﺮﺍ ﮐﮯ ﺍﭨﮭﺎ ۔ ﻭﮦ ﭘﻮﺭﺍ ﭘﺎﻧﯽ ﺳﮯ ﺷﺮﺍﺑﻮﺭ ﺗﮭﺎ ﺍﻭﺭ ﻋﻘﻞ ﺑﮭﯽ

ﭨﮭﮑﺎﻧﮯ ﺁﺋﯽ ﮐﮧ ﻧﯿﻨﺪ ﻣﯿﮟ ﻭﮦ ﮐﯿﺎ ﺑﻮﻝ ﮔﯿﺎ۔

"ﻋﻨﺎﯾﮧ ﻣﯿﺮﯼ ﺑﺎﺕ ﺳﻨﻮ " ﺭﻭﺣﺎﻥ ﻧﮯ ﺍﺳﮯ ﭘﮑﺎﺭﺍ ﻣﮕﺮ ﻭﮦ ﺍﮎ ﭨﮭﺎﮦ ﮐﮯ ﺳﺎﺗﮫ ﺩﺭﻭﺍﺯﮦ ﻣﺎﺭ ﮐﺮ ﭼﻠﯽ

ﮔﺌﯽ۔ ﺭﻭﺣﺎﻥ ﻭﯾﺴﺎ ﺑﮭﯿﮕﺎ ﮨﻮﺍ ﺍﺱ ﮐﮯ ﭘﯿﭽﮭﮯ ﺑﮭﺎﮔﺎ۔ "ﻋﻨﺎﯾﮧ ﻣﯿﺮﯼ ﺑﺎﺕ ﺳﻨﻮ ﭘﻠﯿﺰ"۔

"ﻣﺠﮭﮯ ﮐﭽﮫ ﻧﮩﯿﮟ ﺳﻨﻨﺎ ﺗﻢ ﺳﮯ ﺗﻢ ﺍﮎ ﻧﻤﺒﺮ ﮐﮯ ﺟﮭﻮﭨﮯ ﺍﻧﺴﺎﻥ ﮨﻮ". ﻋﻨﺎﯾﮧ ﻧﮯ ﻧﮩﺎﯾﺖ ﻏﺼﮯ ﺳﮯ ﺭﻭﺣﺎﻥ ﮐﻮ ﺟﻮﺍﺏ ﺩﯾﺎ۔

"ﻋﻨﺎﯾﮧ ﺗﻢ ﻣﯿﺮﮮ ﺳﺎﺗﮫ ﯾﻮﮞ ﮐﺮ ﺳﮑﺘﯽ ہو۔ ﺗﻢ ﺍﯾﺴﮯ ﻣﺠﮭﮯ ﻧﮩﯿﮟ ﺑﻮﻝ ﺳﮑﺘﯽ"۔ ﺭﻭﺣﺎﻥ ﺷﺎﮎ ﮐﮯ ﻋﺎﻟﻢ ﻣﯿﮟ ﻋﻨﺎﯾﮧ ﮐﻮ ﺩﯾﮑﮭﺘﮯ ﮨﻮﺋﮯ ﺑﻮﻻ۔ 

"ﮐﯿﻮﮞ ﻧﮩﯿﮟ ﺑﻮﻝ ﺳﮑﺘﯽ ﺗﻢ ﺟﮭﻮﭨﮯ ﮨﻮ"۔

 "ﻋﻨﺎﯾﮧ ﺗﺎﯾﺎﺟﺎﻥ ﻧﮯ ﻣﯿﺮﮮ ﺍﺑﻮ ﮐﮯ بارے میں  ﺑﮩﺖ ﻏﻠﻂ ﮐﮩﺎ۔ ﻣﯿﮟ ﺍﻥ ﺳﮯ ﺟﺘﻨﺎ ﺑﮭﯽ ﺧﻔﺎ ﮨﻮﮞ ﭘﺮ ﻣﯿﺮﮮ ﺍﺑﻮ ﺍﻣﯽ ﺍﻭﺭ ﭼﮭﻮﭨﺎ ﻣﯿﺮﯼ ﮐﻞ کائنات  ﮨﯿﮟ۔ ﻣﯿﮟ ﯾﮩﺎﮞ ﺁ ﮐﮯ ﮐﺘﻨﺎ ﺑﺪﻝ ﮔﯿﺎ ﯾﻮﮞ ﺗﻢ ﺗﺼﻮﺭ ﺑﮭﯽ ﻧﮩﯽ ﮐﺮ ﺳﮑﺘﯿﮟ۔ ﻣﯿﺮﺍ ﻏﺼﮧ، ﻣﯿﺮﯼ ﺿﺪ ﻣﯿﺮﯼ ﺍﮐﮍ ﺗﻢ ﻧﮯ ﺩﯾﮑﮭﯽ ﻧﮩﯿﮟ۔ﺗﻢ ﻣﺠﮭﮯ ﺍﺳﻼﻡ ﺁﺑﺎﺩ ﻣﯿﮟ ﺩﯾﮑﮭﺘﯿﮟ ﺗﻮ ﺁﺝ ﺗﻢ ﻣﺠﮫ ﺳﮯ ﺍﺗﻨﯽ ﺧﻔﺎ ﻧﮧ ﮨﻮﺗﯿﮟ۔ﺗﺎﯾﺎﺟﺎﻥ ﻧﮯ ﺟﻮ ﮐﮩﺎ ﺍﻥ کی ﺟﮕﮧ ﮐﻮﺋﯽ ﺍﻭﺭ ﮨﻮﺗﺎ ﺗﻮ ﻣﯿﮟ ﺍﻥ ﮐﺎ ﻣﻨﮧ ﺗﻮﮌ ﺩﯾﺘﺎ ﭼﺎﮨﮯ ﻭﮦ ﻣﺠﮫ ﺳﮯ ﮐﺘﻨﮯ ﺑﮭﯽ ﺑﮍﮮ ﮨﻮﺗﮯ۔ ﻣﯿﮟ ﺻﺮﻑ ﺗﻤﮩﺎﺭﯼ ﻭﺟﮧ ﺳﮯ ﺑﺮﺩﺍﺷﺖ ﮐﺮ ﮔﯿﺎ۔ﻣﮕﺮ ﻣﯿﮟ ﻭﮨﺎﮞ ﺭﮐﺘﺎ ﺗﻮ ﻣﺠﮫ ﺳﮯ ﮐﻮﺋﯽ ﻧﮧ ﮐﻮﺋﯽ ﺑﺪﺗﻤﯿﺰﯼ ﮨﻮ ﺟﺎﺗﯽ ﺟﻮ ﺗﻤﮩﯿﮟ ﺑﮩﺖ ﺑﺮﯼ ﻟﮕﺘﯽ۔لیکن ﻣﯿﺮﯼ ﺍﻧﺎ ﻣﺠﮭﮯ ﺍﺱ ﺑﺎﺕ ﮐﯽ ﺍﺟﺎﺯﺕ ﻧﮩﯿﮟ ﺩﮮ ﺭﮨﯽ ﺗﮭﯽ ﮐﮧ ﻣﯿﮟ ﻭﮨﺎﻥ ﺭﮐﺘﺎ"۔

"ﻣﮕﺮ ﺗﺎﯾﺎﺟﺎﻥ ﺷﺮﻣﻨﺪﮦ ﺳﮯ ﺗﮭﮯﺗﻢ ﺳﮯ"۔ ﻋﻨﺎﯾﮧ ﺣﯿﺮﺍﻥ ﺳﯽ ﺍﺱ ﮐﯽ ﺫﺍﺕ ﮐﺎ ﯾﮧ ﺭﺥ ﺩﯾﮑﮭﺘﮯ  ﮨﻮﺋﮯ ﺑﻮﻟﯽ۔ ﺍﻥ ﮐﮯ ﺷﺮﻣﻨﺪﮦ ﮨﻮﻧﮯ ﺳﮯ ﺍﻥ ﮐﮯ ﮐﮩﮯ ﮨﻮﺋﮯ ﺍﻟﻔﺎﻅ ﻭﺍﭘﺲ ﻣﮍ ﻧﮩﯿﮟ ﺳﮑﺘﮯ ﺗﮭﮯ"۔

ﺭﻭﺣﺎﻥ ﺳﺨﺘﯽ ﺳﮯ ﺑﻮﻻ۔ "ﺭﮨﯽ ﺗﻤﮩﺎﺭﯼ ﺑﺎﺕ ﺗﻮ ﻋﻨﺎﯾﮧ ﯾﮧ ﺳﭻ ﮨﮯ ﻣﺠﮭﮯ ﺍﻧﺪﺍﺯﮦ ﮨﯽ ﻧﮩﯿﮟ ﮨﻮﺍ ﮐﮧ ﻣﯿﮟ ﺗﻢ ﭘﺮ ﺍﭘﻨﺎ ﺣﻖ ﺟﺘﺎ ﺭﮨﺎ ﮨﻮﮞ۔ ﺟﻮ ﻟﻮﮒ ﻣﯿﺮﯼ ﺯﻧﺪﮔﯽ ﻣﯿﮟ ﺍﮨﻢ ﮨﯿﮟ ﺍﻥ ﮐﮯ ﻟﺌﮯ ﻣﯿﮟ ﺍﯾﺴﺎ ﮨﯽ ﮨﻮﮞ"۔ ﺭﻭﺣﺎﻥ ﺑﮯﺑﺴﯽ ﺳﮯ ﮐﮩﺘﺎ ﮨﻮﺍ ﻋﻨﺎﯾﮧ ﮐﻮ ﺩﯾﮑﮭﻨﮯ ﻟﮕﺎ ﺟﻮ ﺍﺱ ﮐﯽ ﺑﺎﺕ ﺳﻦ ﮐﺮ ﭼﭗ ﮨﻮﮔﺌﯽ ﺗﮭﯽ۔

کتنا عرصہ  ﮔﺰﺭ گیا پتا ہی نہیں چلا ﺍﻭﺭ ﮨﺎﺭﻭﻥ ﺻﺎﺣﺐ ﮐﯽ ﻓﯿﻤﻠﯽ ﺭﻭﺣﺎﻥ ﮐﮯ ﺟﺎﻧﮯ ﮐﮯ ﺩﻥ ﻗﺮﯾﺐ ﺁﻧﮯ ﭘﺮ ﺩﻥ ﺑﺪﻥ ﺍﻓﺴﺮﺩﮦ تھی۔رمضان ختم ہونے والا تھا۔ﻋﯿﺪ ﻣﯿﮟ ﺍﮎ ﺩﻥ ﺭﮦ ﮔﯿﺎ ﺗﮭﺎ۔

ﺳﺐ ﻟﮍﮐﯿﺎﮞ ﺍﭘﻨﮯ ﺍﭘﻨﮯ ﮐﭙﮍﮮ ﻟﺌﮯ ﮨﺮ ﻃﺮﺡ ﮐﯽ ﻣﯿﭽﻨﮓ ﻣﯿﮟ ﻣﺼﺮﻭﻑ ﺗﮭﯿﮟ۔ﻋﻨﺎﯾﮧ ﺍﭘﻨﮯ ﺳﯿﺎﮦ ڈﺭﯾﺲ ﮐﻮ ﺍﻟﻤﺎﺭﯼ ﻣﯿﮟ ﻟﭩﮑﺎ ﮐﺮ ﺍﭘﻨﯽ ﺗﯿﺎﺭﯼ ﻣﮑﻤﻞ ﮐﺮ ﭼﮑﯽ ﺗﮭﯽ۔ﺑﻘﻮﻝ ﺍﺱ ﮐﮯ ﺑﺎﻗﯽ ﺳﺐ ﻓﯿﺸﻦ ﺍﺳﮑﯽ ﺑﮩﻨﻮﮞ ﭘﺮ ﮨﯽ ﺟﭽﺘﮯ ﮨﯿﮟ ﺟﻮ ﺑﮩﺖ ﭘﯿﺎﺭﯼ ﺗﮭﯿﮟ ﺍﻭﺭ ﻭﮦ ﻧﮩﯿﮟ ﺗﮭﯽ۔ ﯾﮧ ﺻﺮﻑ ﻋﻨﺎﯾﮧ ﮐﯽ ﺳﻮﭺ ﺗﮭﯽ۔ﺍﺳﮯ ﺍﻟﻠﮧ ﺳﮯ ﺷﮑﻮﮮ ﺗﮭﮯ ﺍﻥ ﻣﯿﮟ ﺍﮎ ﯾﮧ ﺑﮭﯽ ﺗﮭﺎ ﮐﮧ ﻭﮦ ﺍﭘﻨﯽ ﺑﮩﻨﻮﮞ ﮐﯽ ﻃﺮﺡ ﺧﻮﺏ ﮔﻮﺭﯼ ﭼﭩﯽ ﻧﮩﯿﮟ ﺗﮭﯽ۔ ﺍﺳﮑﺎ ﺭﻧﮓ ﻧﮧ ﺳﺎﻧﻮﻟﮯ ﭘﻦ ﻣﯿﮟ ﺁﺗﺎ ﻧﮧ ﮔﻨﺪﻣﯽ میں۔ ﮐﮭﻠﺘﺎ ﮨﻮﺍ ﮔﻮﺭﺍ ﺭﻧﮓ ﺗﮭﺎ ﮨﺎﮞ ﺑﮩﻨﻮﮞ ﺟﯿﺴﺎ ﺍﯾﮑﺴﭩﺮﺍ ﻧﮧ ﺗﮭﺎ۔ ﺍﺱ ﮐﯽ ﺑﮩﻨﻮﮞ ﮐﯽ ﺁﻧﮑﮭﻮﮞ ﮐﮯ ﺭﻧﮓ ﺍﻟﮓ ﺗﮭﮯ ﺟﺒﮑﮧ ﺍﺱ ﮐﯽ ﺁﻧﮑﮭﻮﮞ ﮐﺎ ﺭﻧﮓ ﺳﯿﺎﮦ ﺗﮭﺎ۔ ﺍﺳﮯ ﭘﺘﺎ ﮨﯽ ﻧﮩﯿﮟ ﺗﮭﺎ ﺑﮍﯼ ﺍﻭﺭ ﺭﻭﺷﻦ ﺁﻧﮑﮭﯿﮟ ﺍﺱ ﭘﺮ ﮐﺘﻨﯽ ﺟﭽﺘﯽ ﮨﯿﮟ۔ﺑﮍﯼ ﺍﻭﺭ ﺭﻭﺷﻦ ﺁﻧﮑﮭﯿﮟ ﺍﺱ ﻧﮯ ﺍﭘﻨﯽ ﺩﺍﺩﯼ ﺍﻭﺭ ﺑﺎﺑﺎ ﺳﮯ ﭘﺎﺋﯽ ﺗﮭﯿﮟ۔ﺍﮎ ﺍﻭﺭ ﺩﮐﮫ ﺑﮩﻨﻮﮞ ﮐﮯ ﺑﺎﻝ ﺑﮭﻮﺭﮮ ﺍﻭﺭ ﮐﺮﻟﯽ ﺗﮭﮯ ﺟﺲ ﮐﯽ ﻭﺟﮧ ﺳﮯ ﻭﮦ ﺑﮍﮮ ﺑﮭﯽ ﻧﮩﯿﮟ ﻟﮕﺘﮯ ﺗﮭﮯ ﺟﺲ ﻃﺮﺡ ﭼﺎﮨﯿﮟ ﺳﭩﺎﺋﻞ ﺑﻨﺎ ﻟﯿﺘﯽ ﺗﮭﯿﮟ ﺟﺒﮑﮧ ﺍﺱ ﮐﮯ ﺑﺎﻝ ﮐﺎﻟﮯ ﺳﯿﺎﮦ ﻟﻤﺒﮯﺍﻭﺭ ﺳﻠﮑﯽ ﺗﮭﮯ۔ﺑﺲ ﮐﯿﭽﺮ ﻟﮕﺎﯾﺎ ﺍﻭﺭ ﭘﯿﭽﮭﮯ ﭼﮭﻮﮌ ﺩﯾﺎ ﯾﺎ ﮔﺮﻣﯿﻮﮞ ﻣﯿﮟ ﺟﻮﮌﺍ ﺑﻨﺎ ﮐﺮ ﺍﻭﭘﺮ ﮐﺮ ﻟﺌﮯ۔ ﺍﭘﻨﯽ ﺷﺨﺼﯿﺖ ﺍﺳﮯ ﺑﮩﻨﻮﮞ ﮐﮯ ﺁﮔﮯ ﮐﭽﮫ ﻧﮧ ﻟﮕﺘﯽ ﺍﻭﺭ ﯾﮧ ﺻﺮﻑ ﺍﺱ ﮐﺎ ﺧﯿﺎﻝ ﺗﮭﺎ۔ ﺣﺎﻻﻧﮑﮧ ﮨﺮ ﺩﯾﮑﮭﻨﮯ ﻭﺍﻻ ﺍﺳﮯ ﺧﻮﺑﺼﻮﺭﺕ ﻟﮍﮐﯿﻮﮞ ﻣﯿﮟ ﺷﻤﺎﺭ ﮐﺮﺗﺎ ﺗﮭﺎ۔ ﺭﻭﺣﺎﻥ ﺍﻭﺭ ﺑﻼﻝ ﺑﺎﻟﻮﮞ ﮐﯽ ﮐﭩﻨﮓ ﮐﮯ ﻟﺌﮯ ﭼﺎﻧﺪ ﻧﻈﺮ ﺁﻧﮯ ﮐﮯ ﺑﻌﺪ ﮐﮯ ﮔﺌﮯ ﺍﺑﮭﯽ ﺗﮏ ﻧﮩﯿﮟ ﺁﺋﮯ ﺗﮭﮯ۔ ﺭﺍﺕ ﮐﮯ ﻧﻮ ﺑﺞ ﺭﮨﮯ ﺗﮭﮯ۔ ﻋﻨﺎﯾﮧ ﻧﮯ ﺑﮩﻨﻮﮞ ﺳﮯ ﮐﮩﺎ ﺁﻭ ﺟﺐ ﺗﮏ ﻣﮩﻨﺪﯼ ﻟﮕﺎ ﻟﻮﮞ ﺗﻢ ﻟﻮﮔﻮﮞ ﮐﮯ ﮨﺎﺗﮭﻮﮞ ﭘﺮ۔ ﺑﺎﺯﺍﺭ ﺳﮯ ﻭﺍﭘﺴﯽ ﭘﺮ ﺑﮩﺖ ﺩﯾﺮ ﯾﻮ ﺟﺎﺋﮯ ﮔﯽ۔ﺍﻥ ﮐﺎ پروگرام ﺗﮭﺎ ﺁﺝ ﮐﯽ ﭼﺎﻧﺪ ﺭﺍﺕ ﺍﻣﯽ ﮐﮯ ﺑﺠﺎﺋﮯ ﺭﻭﺣﺎﻥ ﮐﮯ ﺳﺎﺗﮫ ﺟﺎﺋﯿﮟ ﮔﯽ ﭼﻮﮌﯾﺎﮞ ﻟﯿﻨﮯ۔ ﻋﻨﺎﯾﮧﺑﺎﺭﯼ ﺑﺎﺭﯼ ﺑﮩﻨﻮﮞ ﮐﮯ ﻣﮩﻨﺪﯼ ﻟﮕﺎ ﺭﮨﯽ ﺗﮭﯽ۔

"ﻋﻨﺎﯾﮧ ﮨﻢ ﺁ ﮔﺌﮯ"۔ ﺭﻭﺣﺎﻥ ﻧﮯ ﺁﺗﮯ ﮨﯽ ﺍﭘﻨﮯ ﺁﻧﮯ ﮐﺎ ﺍﻋﻼﻥ ﮐﯿﺎ۔ﻋﻨﺎﯾﮧ ﻧﮯ ﺳﺮﺳﺮﯼ ﺳﯽ ﻧﻈﺮ ڈﺍﻝ ﮐﮯ ﺍﭼﮭﺎ ﮐﮩﺎ۔ﻋﻠﯿﺰﮮ ﭼﺎﺋﮯ ﺑﻨﺎﻧﮯ ﮐﮯ ﻟﺌﮯ ﺍﭨﮭﯽ۔ ﺭﻭﺣﺎﻥ ﺍﻭﺭ ﺑﻼﻝ ﺁ ﮐﮯ ﺍﻥ ﮐﮯ ﭘﺎﺱ ﺑﯿﭩﮫ ﮔﺌﮯ۔ﺭﻭﺣﺎﻥ ﮐﺒﮭﯽ ﮐﺲ ﻭﺟﮧ ﺳﮯ ﻋﻨﺎﯾﮧ ﮐﻮ ﺁﻭﺍﺯ ﺩﯾﺘﺎ ﮐﺒﮭﯽ ﮐﺲ ﻭﺟﮧ ﺳﮯ۔ ﻋﻨﺎﯾﮧ ﺳﺮ ﺍﭨﮭﺎﺋﮯ بغیر ﺍﺳﮯ ﺟﻮﺍﺏ ﺩﮮ ﺭﮨﯽ ﺗﮭﯽ ﮐﮧ ﻣﮩﻨﺪﯼ ﺟﻠﺪﯼ ﺧﺘﻢ ﮐﺮﻧﯽ ﺗﮭﯽ ﺑﺎﺯﺍﺭ ﺑﮭﯽ ﺟﺎﻧﺎ ﺗﮭﺎ۔

"ﻋﻨﺎ ﺳﺮ ﺍﭨﮭﺎ ﮐﺮ ﺍﮎ ﺑﺎﺭ ﺭﻭﺣﺎﻥ ﺑﮭﯿﺎ ﮐﯽ ﮨﯿﺌﺮ ﮐﭩﻨﮓ ﺩﯾﮑﮫ ﻟﯿﮟ ﻭﮦ ﮐﺐ ﺳﮯ ﮐﯿﺴﯽ ﮐﯿﺴﯽ ﺑﮯﺗﮑﯽ ﺑﺎﺗﯿﮟ کرکے ﺁﭖ ﮐﻮ ﻣﺘﻮﺟﮧ ﮐﺮ ﺭﮨﮯ ﮨﯿﮟ ﺍﻭﺭ ﺁﭖ ﮨﯿﮟ ﮐﮧ ﺍﻥ ﮐﯽ ﻃﺮﻑ ﻧﻈﺮ ﮨﯽ ﻧﮩﯿﮟ ﺍﭨﮭﺎ ﺭﮨﯽ ﮨﯿﮟ"۔

 ﻋﻨﺎﯾﮧ ﺳﺐ ﺳﮯ ﭼﮭﻮﭨﯽ ﺷﺎﻧﺰﮮ ﮐﯽ ﺑﺎﺕ ﭘﺮ ﺣﯿﺮﺍﻥ ﮨﻮ ﮐﺮ ﺭﻭﺣﺎﻥ ﮐﻮ ﺩﯾﮑﮭﻨﮯ ﻟﮕﯽ۔

"ﺍﭼﮭﮯ ﻟﮓ ﺭﮨﮯ ﮨﯿﮟ"۔ ﻋﻨﺎﯾﮧ ﻧﮯ ﻣﺎﺷﺎﺍﻟﻠﮧ ﮐﮩﺘﮯ ﮨﻮﺋﮯ ﮐﮩﺎ۔ﻭﮦ ﺟﺘﻨﺎ ﺧﻮﺑﺼﻮﺭﺕ ﺗﮭﺎ ﺍﺗﻨﺎ ﮨﯽ ﻻﭘﺮﻭﺍﮦ تھا۔ 20 ﺳﺎﻝ ﮐﺎ ﺗﮭﺎ ﺍﺑﮭﯽ ﻭﮦ  ﻣﮕﺮ ﻟﮕﺘﺎ ﭼﻮﺑﯿﺲ ﭘﭽﯿﺲ ﺳﺎﻝ ﮐﺎ ﺗﮭﺎ۔

 "ﮨﺎﮨﺎﮨﺎ ﻋﻨﺎ ﺍﺗﻨﯽ ﺳﯽ ﺑﺎﺕ ﺳﻨﻨﮯ ﮐﮯ ﻟﺌﮯ ﺭﻭﺣﺎﻥ  ﺑﮭﯿﺎ ﮐﺐ ﺳﮯ ﺑﮯﺗﺎﺏ ﺗﮭﮯ"۔ ﺷﺎﻧﺰﮮ ﮨﻨﺴﺘﮯ ﮨﻮﺋﮯ ﺑﻮﻟﯽ۔ ﺭﻭﺣﺎﻥ ﺑﮭﯽ ﻣﺴﮑﺮﺍ ﺩﯾﺎ ﮐﮧ ﺣﻘﯿﻘﺖ ﺑﮭﯽ ﯾﮩﯽ ﺗﮭﯽ ﻭﮦ ڈﺍﺋﺮﯾﮑﭧ ﭘﻮﭼﮫ ﻧﮩﯿﮟ ﺭﮨﺎ ﺗﮭﺎ ﺍﻭﺭ ﻋﻨﺎﯾﮧ ﮐﯽ ﺗﻮﺟﮧ ﺑﮭﯽ ﭼﺎﮦ ﺭﮨﺎ ﺗﮭﺎ۔ﺍﺱ ﮐﯽ ﺗﻌﺮﯾﻒ ﭘﮧ ﻭﮦ ﻣﻄﻤﺌﻦ ﮨﻮ ﮐﺮ ﺑﺎﮨﺮ ﻧﮑﻞ ﮔﯿﺎ۔

"ﭼﻠﻮ ﻟﮍﮐﯿﻮﮞ ﺍﻭﺭ ﮐﺘﻨﺎ ﺍﻧﺘﻈﺎﺭ ﮐﺮﻭ ﮔﯽ ﺭﻭﺣﺎﻥ ﮐﺎ ﻭﮦ ﺩﻭﺳﺘﻮﮞ ﻣﯿﮟ ﮨﻮﮔﺎ ﺍﻭﺭ ﮐﯿﺎ ﺗﻢ ﻟﻮﮔﻮﮞ ﻧﮯ ﺍﺳﮯ ﮐﮩﺎ ﺗﮭﺎ ﺳﺎﺗﮫ ﺟﺎﻧﮯ ﮐﻮ"۔ ﻃﯿﺒﮧ ﺑﯿﮕﻢ ﻧﮯ ﺑﯿﭩﯿﻮﮞ ﮐﻮ ﻣﺨﺎﻃﺐ ﮐﺮ ﮐﮯ ﮐﮩﺎ۔ "ﻧﮩﯿﮟ ﺍﻣﯽ ﮨﻢ ﻧﮯ ﺗﻮ ﺭﻭﺣﺎﻥ ﺑﮭﯿﺎ ﺳﮯ ﻧﮩﯿﮟ ﮐﮩﺎ ﺗﮭﺎ۔ ﮨﺎﮞ ذﮐﺮ ﮐﯿﺎ ﺗﮭﺎ ﮐﮧ ﮨﻢ ﺭﺍﺕ ﮐﻮ ﭼﻮﮌﯾﺎﮞ ﻟﯿﻨﮯ ﺟﺎﺋﯿﮟﮔﯽ"۔ ﻋﻠﯿﺰﮮ ﻧﮯ ﺍﻓﺴﺮﺩﮔﯽ ﺳﮯ ﮐﮩﺎ۔  ﺍﺱ پر ﺑﺎﺑﺎﺟﺎﻧﯽ ﺑﮭﯽ بوﻟﮯ ﮔﯿﺎﺭﮦ ﺑﺞ ﮔﺌﮯ ﮨﯿﮟ ﺁﭖ ﻟﻮﮒ ﮐﺐ ﺟﺎﻭ ﮔﯽ ﺍﻭﺭ ﮐﺐ ﺁﻭ ﮔﯽ۔ ﺳﻮ ﻭﮦ ﻟﻮﮒ ﺍﻣﯽ ﮐﮯ ﺳﺎﺗﮫ ﭼﻠﯽ ﮔﯿﺌﮟ۔ ﺑﺎﺑﺎﺟﺎﻧﯽ ﺍﻧﮭﯿﮟ ﻣﺎﺭﮐﯿﭧ ﭼﮭﻮﮌ ﺁﺋﮯ ﺍﻭﺭ ﮐﮩﺎ ﺍﺗﻨﮯ ﺑﺠﮯ ﺁﭖ ﮐﻮ ﻟﯿﻨﮯ ﺁﻭﮞ ﮔﺎ ﺍﺱ ﻭﻗﺖ ﺁﭖ ﻟﻮﮒ ﭘﺎﺭﮐﻨﮓ ﺍﯾﺮﯾﺎ ﻣﯿﮟ ﺁ ﺟﺎﻧﺎ۔ "ﺍﺭﮮ ﺭﻭﺣﺎﻥ ﺑﮭﯿﺎ ﻭﮦ ﺭﮨﮯ"۔ ﻭﮦ ﻟﻮﮒ ﺳﺎﺭﯼ ﺷﻮﭘﻨﮓ ﮐﺮ ﮐﮯ ﺍﺏ ﮐﭽﮫ ﮐﮭﺎﻧﮯ ﮐﮯ ﻟﺌﮯ ﺁﮔﮯ ﺑﮍﮬﯿﮟ۔ ﺗﻮ ﻣﺎﮦﺟﺒﯿﮟﮐﯽ ﻧﻈﺮ ﺭﻭﺣﺎﻥ ﭘﺮ ﭘﮍﯼ۔ ﺭﻭﺣﺎﻥ ﻧﮯ ﺑﮭﯽ ﺍﻧﮩﯿﮟ ﺩﯾﮑﮫ ﻟﯿﺎ ﺗﮭﺎ ﻭﮦ ﺑﮭﯽ ﺍﻥ ﮐﯽ ﻃﺮﻑ ﺁﯾﺎ۔

"ﺁﭖ ﺍﺱ ﻭﻗﺖ ﯾﮩﺎﮞ ﮨﯿﮟ ﺭﺍﺕ ﮐﺎ ﺍﯾﮏ ﺑﺠﺘﺎ ﺩﯾﮑﮫ ﮐﮯ ﺭﻭﺣﺎﻥ ﺣﯿﺮﺍﻥ ﮨﻮﺍ۔

"ﮨﺎﮞ ﺗﻮ ﺁﺝ ﭼﺎﻧﺪ ﺭﺍﺕ ﮨﮯ ﮨﻢ ﮨﺮ ﺳﺎﻝ ﺁﺗﮯ ﮨﯿﮟ ﭼﺎﻧﺪ ﺭﺍﺕ ﮐﻮ ﭼﻮﮌﯾﺎﮞ ﻟﯿﻨﮯ"۔ ﻋﻠﯿﺰﮮ ﻧﮯ ﺣﯿﺮﺕ ﺳﮯ ﺭﻭﺣﺎﻥ ﮐﻮ ﺍﭘﻨﯽ ﻃﺮﻑ ﺩﯾﮑﮭﻨﮯ ﭘﺮ ﮐﮩﺎ۔

"ﮨﺎﮞ ﻭﮦ ﺗﻮ ﭨﮭﯿﮏ ﭘﺮ ﺍﺏ ﭨﺎﺋﻢ ﮐﯿﺎ ﮨﻮﺍ ﮨﮯ"۔ ﻭﮦ ﻋﻨﺎﯾﮧ ﮐﻮ ﺩﯾﮑﮭﺘﮯ ﮨﻮﺋﮯ ﺑﻮﻻ ﺟﻮ ﯾﮑﺴﺮ ﺍﺱ ﮐﯽ ﻣﻮﺟﻮﺩﮔﯽ ﮐﻮ ﻧﻈﺮﺍﻧﺪﺍﺯ ﮐﺌﮯ ﮨﻮﺋﮯ ﺗﮭﯽ۔"ﭼﻠﻮ ﺍﺏ ﺳﺎﺗﮫ ﭼﻠﺘﮯ ﮨﯿﮟ"۔ ﺭﻭﺣﺎﻥ ﻧﮯ ﭘﮭﭙﻮ ﮐﻮ ﺩﯾﮑﮭﺘﮯ ﮨﻮﺋﮯ ﮐﮩﺎ۔

"ﮐﻮﺋﯽ ﺿﺮﻭﺭﺕ ﻧﮩﯿﮟ ﺑﺎﺑﺎﺟﺎﻧﯽ ﮨﻤﮩﯿﮟ ﻟﯿﻨﮯ ﺁﺗﮯ ﮨﯽ ﮨﻮﻧﮕﮯ ﺁﭖ ﺍﭘﻨﯽ ﭼﺎﻧﺪ ﺭﺍﺕ ﺍﻧﺠﻮﺍﺋﮯ ﮐﺮﯾﮟ"۔ ﻋﻨﺎﯾﮧ ﻧﮯ ﺍﺳﮑﯽ ﻃﺮﻑ ﺩﯾﮑﮫ ﮐﺮ ﺳﺨﺘﯽ ﺳﮯ ﮐﮩﺎ۔ﺭﻭﺣﺎﻥ ﺍﺱ ﮐﮯ ﺑﻮﻟﻨﮯ ﮐﮯ ﺍﻧﺪﺍﺯ ﺳﮯ ﮨﯽ ﭼﭗ ﮨﻮﮔﯿﺎ۔ "ﭼﻠﯿﮟ ﺭﻭﺣﺎﻥ ﺑﮭﯿﺎ ﺍﺏ ﮐﭽﮫ ﭘﯿﭧ ﭘﻮﺟﺎ ﺑﮭﯽ ﮨﻮ ﺟﺎﺋﮯ". ﻋﻠﯿﺰﮮ ﻧﮯ ﻣﺎﺣﻮﻝ ﮐﺎ ﺗﻨﺎﻭ ﮐﻢ ﮐﺮﻧﮯ ﮐﮯ ﻟﺌﮯ ﺍﮎ ﺩﻡ ﮐﮩﺎ۔ 

"ﮐﻮﺋﯽ ﺿﺮﻭﺭﺕ ﻧﮩﯿﮟ۔ ﺍﻣﯽ ﭼﻠﯿﮟ ﺍﺏ ﻣﺠﮭﮯ ﮔﮭﺒﺮﺍﮨﭧ ﮨﻮ ﺭﮨﯽ ﮨﮯ". ﻋﻨﺎﯾﮧ ﻧﮯ ﺍﮎ ﺩﻡ ﺑﺎﺕ ﮐﺎﭦ ﮐﺮﮐﮩﺎ۔ اپنے ﺷﻮﺭ ﻣﭽﺎﻧﮯ ﭘﺮ  ﻭﮦ ﺍﻣﯽ ﮐﻮ ﮔﮭﺮ ﻭﺍﭘﺲ ﺟﺎﻧﮯ ﭘﺮ ﺭﺿﺎﻣﻨﺪ ﮐﺮ ﮔﺌﯽ۔

ﮔﮭﺮ ﻭﺍﭘﺲ ﺁ ﮐﺮ ﺳﺐ ﻋﻨﺎﯾﮧ ﮐﮯ ﺭﻭﻡ ﻣﯿﮟ ﮨﯽ ﭼﯿﺰﯾﮟ ﻟﮯ ﮐﺮ ﺑﯿﭩﮫ ﮔﺌﯿﮟ۔ﻋﻨﺎﯾﮧ ﮐﻮ ﭘﺘﺎ ﻧﮩﯿﮟ ﻋﺠﯿﺐ ﺳﺎ ﺩﮐﮫ ﮨﻮ ﺭﮨﺎ ﺗﮭﺎ ﻭﮦ ﺍﭘﻨﯽ ﮐﯿﻔﯿﺖ ﺧﻮﺩ ﺳﻤﺠﮭﻨﮯ ﺳﮯ ﻗﺎﺻﺮ ﺗﮭﯽ۔ ﺍﺳﯽ ﮐﯿﻔﯿﺖ ﻣﯿﮟ ﻭﮦ ﺍﻣﯽ ﮐﮯ ﭘﺎﺱ ﮐﭽﻦ ﻣﯿﮟ ﺁ ﮔﺌﯽ ۔ﺍﻣﯽ ﺳﻮﯾﺎﮞ ﺑﻨﺎﻧﮯ ﮐﯽ ﺗﯿﺎﺭﯾﻮﮞ ﻣﯿﮟ ﻣﺼﺮﻭﻑ ﺗﮭﯿﮟ۔ " ﺍﻣﯽ ﺁﭖ ﺭﻭﻡ ﻣﯿﮟ ﺟﺎﺋﯿﮟ ﻣﯿﮟ ﮐﺮﺗﯽ ﮨﻮﮞ". عنایہ نے مدھم سی آواز میں اپنی امی سے کہا۔

 "ﺍﺭﮮ ﻧﯿﮩﮟ ﺑﯿﭩﺎ ﻣﯿﮟ ﮐﺮ ﻟﻮﻧﮕﯽ ﺗﻤﮩﺎﺭﯼ ﻃﺒﯿﻌﺖ ﻭﯾﺴﮯ ﺑﮭﯽ ﭨﮭﯿﮏ ﻧﮩﯿﮟ ہے". ﺍﻣﯽ ﻧﮯ ﺍﺱ ﮐﮯ ﻣﺮﺟﮭﺎﺋﮯ ﭼﮩﺮﮦ ﮐﻮ ﺩﯾﮑﮫ ﮐﺮ ﮐﮩﺎ۔

"ﻧﮩﯿﮟ ﺍﻣﯽ ﻣﯿﮟ ﺑﻠﮑﻞ ﭨﮭﯿﮏ ﮨﻮﮞ ﺁﺝ ﺩﻝ ﮐﺮ ﺭﮨﺎ ﮐﮧ ﻣﯿﮟ ﺑﮭﯽ ﮐﭽﮫ ﺑﻨﺎﻭﮞ. ﺁﭖ ﺳﺐ ﺳﻮﺍﺋﮯ ﭼﺎﺋﮯ بنانے کے ﻣﺠﮭﮯ ﮐﭽﮫ اور ﮐﺮﻧﮯ ﮨﯽ ﻧﮩﯿﮟ ﺩﯾﺘﮯ"۔ﺍﺱ ﮐﮯ ﺑﮯﺣﺪ ﺍﺻﺮﺍﺭ ﭘﺮ ﺍﻣﯽ ﺍﺳﮯ ﭘﯿﺎﺭ ﮐﺮﺗﮯ ﮨﻮﺋﮯ ﺍﭘﻨﮯ ﮐﻤﺮﮦ ﮐﯽ ﻃﺮﻑ ﺑﮍﮬﯿﮟ۔ ﻋﻨﺎﯾﮧ ﻧﮯ ﺳﻮﯾﺎﮞ ﺑﻨﺎﻧﮯ ﮐﮯ ﻟﺌﮯ ﺩﻭﺩﮪ ﺍﻟﮓ ﭼﮍﮬﺎﯾﺎ ﺍﻭﺭ  ﭼﺎﺋﮯ ﮐﮯ ﻟﺌﮯ ﭘﺎﻧﯽ ﺭﮐﮫ ﮨﯽ ﺭﮨﯽ ﺗﮭﯽ ﮐﮧ ﺭﻭﺣﺎﻥ ﺍﺳﮯ ﭘﮑﺎﺭﺗﺎ ﮨﻮﺍ ﮐﭽﻦ ﻣﯿﮟ ﺁﯾﺎ۔ ﺭﻭﺣﺎﻥ ﮐﻮ ﺩﯾﮑﮫ ﮐﺮ ﻋﻨﺎﯾﮧ ﮐﺎ ﺩﻝ ﭘﮭﺮ ﺩﮐﮫ ﺳﮯ ﺑﮭﺮ ﮔﯿﺎ۔

"ﻋﻨﺎ ﮐﯿﺎ ﺑﺎﺕ ﮨﮯ ﺗﻢ ﺁﺝ ﺍﺗﻨﯽﺧﺎﻣﻮﺵ ﮐﯿﻮﮞ ﮨﻮ۔ ﺑﺎﻗﯽ ﺳﺐ ﻣﻮﺝ ﻣﺴﺘﯿﺎﮞ ﮐﺮ ﺭﮨﯽ ﮨﯿﮟ ﺍﻭﺭ ﺗﻢ ﮐﭽﻦ ﻣﯿﮟ ﮨﻮ".

"ﮐﯿﻮﮞ ﻣﯿﮟ ﮐﭽﻦ ﻣﯿﮟ ﻧﮩﯿﮟ ﮨﻮ ﺳﮑﺘﯽ". ﻋﻨﺎﯾﮧ ﻧﮯ ﻧﮩﺎﯾﺖ ﺩﺭﺷﺘﮕﯽ ﺳﮯ ﺭﻭﺣﺎﻥ ﮐﻮ ﺟﻮﺍﺏ ﺩﯾﺎ۔ "ﮐﯿﺎ ﺑﺎﺕ ﮨﮯ ﻋﻨﺎ ﺗﻢ ﺑﺎﺯﺍﺭ ﻣﯿﮟﺑﮭﯽ ﻣﺠﮫ ﺳﮯ ﺳﺨﺖ ﻟﮩﺠﮯ ﻣﯿﮟ ﺑﻮﻟﯿﮟ ﺗﮭﯿﮟ ﺍﻭﺭ ﺍﺏ ﺑﮭﯽ"۔ روحان حیران سا اسے دیکھتے ہوئے بولا۔ "ﮐﻮﺋﯽ ﺑﺎﺕ ﻧﮩﯿﮟ ہے۔ ﺗﻢ ﺟﺎﻭ ﺍﭘﻨﮯ ﺩﻭﺳﺘﻮﮞ ﮐﮯ ﺳﺎﺗﮫ۔ ﺗﻤﮩﯿﮟ اس سے ﮐﯿﺎ ﺟﻮ ﮨﻢ ﻧﮯ ﺗﻤﮩﺎﺭﺍ ﺍﺗﻨﺎ ﺍﻧﺘﻈﺎﺭ ﮐﯿﺎ ﮐﮧ آج ہم سب ﺗﻤﮩﺎﺭﮮ ﺳﺎﺗﮫ ﺑﺎﺯﺍﺭ ﺟﺎﺋﯿﻨﮕﯽ۔ ﺗﻤﮩﯿﮟ اس سے ﮐﯿﺎ ﺟﻮ ﮨﻢ ﺁﺝ ﺑﮭﯽ ﺍﻣﯽ ﮐﮯ ﺳﺎﺗﮫ گئیں ﭼﻮﮌﯾﺎﮞ ﻟﯿﻨﮯ۔ ﺗﻤﮩﯿﮟ اس سے ﮐﯿﺎ ﺟﻮ ﺁﺝ ﺑﮭﯽ ﻣﯿﮟ ﺑﻼﻝ ﮐﺎ ﮨﺎﺗﮫ ﭘﮑﮍ ﮐﺮ ﺑﺎﺯﺍﺭ ﻣﯿﮟ ﭼﻠﯽ۔ ﻣﯿﮟ ﻧﮯ ﺳﻮﭼﺎ ﺗﮭﺎ ﺁﺝ ﺗﻢ ﮨﻮﮔﮯ ﮨﻤﮩﺎﺭﮮ ﺳﺎﺗﮫ ﺑﺎﺯﺍﺭ ﻣﯿﮟ۔ ﺭﺍﺳﺘﮧ ﺑﻨﺎ ﮐﮯ ﺩﻭﮔﮯ۔ ﮐﻮﺋﯽ ﻟﮍﮐﺎ ﺳﯿﭩﯽ ﻧﮩﯿﮟ ﺑﺠﺎ ﺳﮑﮯ ﮔﺎ ﺗﻤﮩﯿﮟ

ﺩﯾﮑﮫ ﮐﺮ ﮨﻤﮩﺎﺭﮮ ﺳﺎﺗﮫ".

 ﯾﮧ ﮐﮩﺘﮯ ﮨﻮﺋﮯ ﻋﻨﺎﯾﮧ ﮨﭽﮑﯿﻮﮞ ﺳﮯ ﺭﻭﻧﮯ ﻟﮕﯽ۔ ﺭﻭﺣﺎﻥ نے ﺩﮐﮫ ﺳﮯ ﻋﻨﺎﯾﮧ ﮐﻮ ﺭﻭﺗﮯ ﮨﻮﺋﮯ ﺩﯾﮑﮭﺎ ﺍﺳﮯ ﺍﭘﻨﮯ ﺁﭖ ﭘﺮ ﺷﺪﯾﺪ ﻏﺼﮧ آ رہا تھا ﮐﮧ ﺍﺳﮑﯽ ﻭﺟﮧ ﺳﮯ ﻋﻨﺎﯾﮧ ﺍﺗﻨﮯ ﺩﮐﮫ ﺳﮯ ﺭﻭ ﺭﮨﯽﺗﮭﯽ۔

"ﺗﻢ ﻧﮯ ﮐﮩﺎ ﮐﺐ ﺗﮭﺎ ﻋﻨﺎ ﮐﮯ ﺗﻢ ﻟﻮﮔﻮﮞ ﮐﮯ ﺳﺎﺗﮫ ﺟﺎﻭﮞ".

"ﮐﯿﻮﮞ ﺗﻤﮩﯿﮟ ﭘﺘﺎ ﻧﮩﯿﮟ ﺗﮭﺎ ﮨﻢ ﺟﺎﺋﯿﮟ ﮔﮯ".

"ﮨﺎﮞ ﭘﺘﺎ ﺗﮭﺎ ﻣﮕﺮ ﻣﯿﮟ ﻧﮯ ﺳﻮﭼﺎ ﯾﮧ ﺧﺎﻟﺺ ﻟﮍﮐﯿﻮﮞ ﮐﺎ ﺷﻌﺒﮧ ﮨﮯ۔ ﮨﻤﮩﺎﺭﯼ ﮐﻮﺋﯽ ﺑﮩﻦ ﻧﮩﯿﮟ ﺗﻮ ﺍﻥ ﺑﺎﺗﻮﮞ ﮐﺎ ﭘﺘﺎ ﺑﮭﯽ ﻧﮩﯿﮟ"۔ 

ﺭﻭﺣﺎﻥ ﻧﮯ ﺑﮯﺑﺴﯽ ﺳﮯ ﮐﮩﺎ۔ ﺍﺱ ﮐﺎ ﺑﺲ ﻧﮩﯿﮟ ﭼﻞ ﺭﮨﺎ ﺗﮭﺎ ﮐﮧ ﻋﻨﺎﯾﮧ ﮐﯽ ﺁﻧﮑﮭﻮﮞ ﺳﮯ ﺳﺎﺭﮮ ﺁﻧﺴﻮ ﭼﻦ ﻟﮯ۔ ﺍﺳﮑﯽ ﺑﺎﺕ ﭘﺮ ﻋﻨﺎﯾﮧ ﮐﻮ ﮨﻮﺵ ﺁﯾﺎ ﺩﮐﮫ ﺍﻭﺭ ﻏﺼﮯ ﻣﯿﮟ ﻧﺠﺎﻧﮯ ﻭﮦ ﮐﯿﺎ ﮐﯿﺎ ﺑﻮﻝ ﮔﺌﯽ۔ " ﮐﻮﺋﯽ ﺑﺎﺕ ﻧﮩﯿﮟ ﻣﺠﮭﮯ ﺑﺲ ﻭﯾﺴﮯ ﮨﯽ ﺩﮐﮫ ﺁ ﮔﯿﺎ ﺗﮭﺎ"۔ ﻋﻨﺎﯾﮧ ﻧﮯ ﺧﻮﺩ ﮐﻮ ﺳﻨﺒﮭﺎﻟﺘﮯ ﮨﻮﺋﮯ ﮐﮩﺎ۔ "ﺗﻮ ﺟﻨﺎﺏ ﮐﻮ ﺍﺱ ﻣﻈﻠﻮﻡ ﭘﮧ ﻏﺼﮧ ﺁﯾﺎ ﺟﺴﮯ ﺍﭘﻨﺎ ﻗﺼﻮﺭ ﮨﯽ ﻧﮩﯿﮟ ﭘﺘﺎ ﺗﮭﺎ"۔

ﺭﻭﺣﺎﻥ ﮐﯽ ﺑﺎﺕ ﭘﺮ ﻋﻨﺎﯾﮧ ﮨﻨﺲ ﺩﯼ۔ﺍﺳﮯ ﭘﺘﺎ ﮨﯽ ﻧﮩﯿﮟ ﺗﮭﺎ ﺟﺐ ﻭﮦ ﮨﻨﺴﺘﯽ ﺗﻮ ﺍﺳﮑﯽ ﺁﻧﮑﮭﯿﮟ ﺑﮭﯽ ﮨﻨﺴﺘﯽ ﺗﮭﯿﮟ۔ﺭﻭﺷﻦ ﭼﻤﮑﺪﺍﺭ۔ ﺭﻭﺣﺎﻥ ﻧﮯ

ﺍﺳﮯ ﮨﻨﺴﺘﺎ ﺩﯾﮑﮫ ﮐﮯ ﺍﻟﻠﮧ ﮐﺎ ﺷﮑﺮ ﺍﺩﺍ ﮐﯿﺎ۔ﻣﮕﺮ ﻭﮦ ﺍﺱ ﺑﺎﺕ ﭘﮧ ﺣﯿﺮﺍﻥ ﺗﮭﺎ ﮐﮧ ﻋﻨﺎﯾﮧ ﮐﮯ ﺭﻭﻧﮯ ﺳﮯ ﺍﺳﮯ ﺍﺗﻨﯽ ﺷﺪﺕ ﺳﮯ ﺗﮑﻠﯿﻒ ﮐﯿﻮﮞ ﮨﻮﺋﯽ۔ﻭﮦ ﺑﮩﺖ ﺳﺨﺖ ﺩﻝ ﺗﮭﺎ ﻣﮕﺮ ﻋﻨﺎﯾﮧ ﮐﮯ ﺁﻧﺴﻮ ﺍﺳﮯ ﺍﭘﻨﮯ ﺩﻝ ﭘﺮ ﮔﺮﺗﮯ ﻣﺤﺴﻮﺱ ﮨﻮﺋﮯ ﺗﮭﮯ۔

ﺻﺒﺢ ﻋﯿﺪ ﺍﭘﻨﯽ ﭘﻮﺭﯼ ﺁﺏ ﺗﺎﺏ ﮐﮯ ﺳﺎﺗﮫ ﺷﺮﻭﻉ ﮨﻮﭼﮑﯽ ﺗﮭﯽ۔ ﺳﺐ ﻧﮯ ﺑﺎﺑﺎﺟﺎﻧﯽ ﺭﻭﺣﺎﻥ ﺍﻭﺭ ﺑﻼﻝ ﮐﮯ ﻋﯿﺪﮔﺎﮦ ﺟﺎﺗﮯ ﮨﯽ اپنے اپنے کمروں ﮐﯽ طرف ﺩﻭﮌ ﻟﮕﺎﺋﯽ ﮐﯿﻮﻧﮑﮧ ﺑﺎﺑﺎﺟﺎﻧﯽ ﻧﻤﺎﺯ ﺍﻭﺭ ﺳﺐ ﺳﮯ ﻋﯿﺪ ﻣﻞ ﮐﺮ ﮔﮭﺮ ﺁﺗﮯ ﺗﻮ ﺳﺐ ﮐﻮ ﺍﭘﻨﮯ ﭘﺎﺱ ﺑﭩﮭﺎﺗﮯ۔ ﻋﯿﺪﯼ ﺩﯾﺘﮯ ﺍﻭﺭ ﺳﺐ ﻣﻞ ﮐﮯ ﺳﻮﯾﺎﮞ ﮐﮭﺎﺗﮯ۔

"ﺍﺳﻼﻡ ﻋﻠﯿﮑﻢ ﺍﻭﺭ ﻋﯿﺪ ﻣﺒﺎﺭﮎ". ﻋﻨﺎﯾﮧ ﻧﮯ ﺑﺎﺑﺎ ﺭﻭﺣﺎﻥ ﺍﻭﺭ ﺑﻼﻝ ﮐﻮ ﺍﻧﺪﺭ ﺩﺍﺧﻞ ﮨﻮﺗﮯ ﺩﯾﮑﮫ ﮐﺮ ﮐﮩﺎ۔ ﺍﯾﮏ ﺍﯾﮏ ﮐﺮ ﮐﮯ ﺳﺐ ﺁﺗﯽ گئیں ﺍﻭﺭ ﺑﺎﺑﺎﺟﺎﻧﯽ ﺳﮯ ﻋﯿﺪﯼ ﻟﯿﺘﯽ ﺭﮨﯿﮟ۔ ﺭﻭﺣﺎﻥ ﻧﮯ ﺳﺐ ﮐﻮ ﻋﯿﺪﯼ ﺩﯼ۔ ﺣﺎﻻﻧﮑﮧ ﻭﮦ ﺍﺑﮭﯽ ﺧﻮﺩ ﻣﺎﮞ ﺑﺎﭖ ﺳﮯ ﭘﯿﺴﮯ ﻟﯿﺘﺎ ﺗﮭﺎ۔ﻭﮦ ﺍﭘﻨﮯ ﺑﺎﭖ ﺳﮯ ﺍﻟﮓ ﺍﻭﺭ ﻣﺎﮞ ﺳﮯ ﺍﻟﮓ ﭘﯿﺴﮯ ﻣﻨﮕﻮﺍﺗﺎ ﺗﮭﺎ۔ ﻋﻨﺎﯾﮧ ﺑﮯﺣﺪ ﺳﺎﺩﮦ ﺳﯽ ﺗﮭﯽ ﺍﺱﻧﮯ ﺑﻠﯿﮏ ﮐﻠﺮ ﮐﺎ ﺳﻮﭦ ﭘﮩﻨﺎ ﮨﻮﺍ ﺗﮭﺎ ﺍﻭﺭ ﺍﺱ ﮐﮯ ﺳﺎﺗﮫ ﺟﭻ ﺑﮭﯽ ﺭﮨﺎ ﺗﮭﺎ۔ ﺑﺎﻗﯽ ﺳﺐ ﭨﮭﯿﮏ ﭨﮭﺎﮎ ﺗﯿﺎﺭ ﮨﻮﺉ ﺗﮭﯿﮟ۔ ﺭﻭﺣﺎﻥ طبیعت ﺳﺎﺩﮦ ﻣﺰﺍﺝ ﺗﮭﺎ۔ ﻟﮍﮐﯿﺎﮞ ﺍﺳﮯ ﺳﺎﺩﮦ ﮨﯽ ﺍﭼﮭﯽ ﻟﮕﺘﯽ ﺗﮭﯿﮟ۔ ﻣﯿﮏ ﺍﭖ ﺩﯾﮑﮫ ﮐﺮ ﺍﺳﮯ ﺣﯿﺮﺍﻧﮕﯽ ﮨﻮﺗﯽ ﺗﮭﯽ ﮐﮧ ﺟﻮ ﺷﮑﻞ ﺍﻟﻠﮧ ﻧﮯ ﺑﻨﺎﺋﯽ ﺍﺳﮯ ﻣﺰﯾﺪ ﺧﻮﺑﺼﻮﺭﺕ ﺑﻨﺎﻧﮯ ﮐﺎ ﻓﺎﺋﺪﮦ۔ ﺑﺎﻗﯽ ﺳﺐ ﮐﮯ ﺳﺮ ﭘﮧ ﮨﺎﺗﮫ ﺭﮐﮫ ﮐﺮ ﻭﮦ ﻋﻨﺎﯾﮧ ﮐﯽ ﻃﺮﻑ ﺁﯾﺎ ﺍﺳﮯ ﺍﻧﺪﺍﺯﮦ ﮨﯽ ﻧﮩﯿﮟ ﮨﻮﺍ ﮐﮧ ﺍﺱ ﻧﮯ ﻋﻨﺎﯾﮧ ﮐﮯ ﺳﺮ ﭘﮧ ﮨﺎﺗﮫ ﻧﮩﯿﮟ ﺭﮐﮭﺎ۔

"ﺑﮩﺖ ﭘﯿﺎﺭﯼ ﻟﮓ ﺭﮨﯽ ﮨﻮ ﻋﻨﺎ"۔" ﺭﻭﺣﺎﻥ ﮐﺎ ﯾﮧ ﮐﮩﻨﺎ ﺗﮭﺎ ﮐﮧ ﺑﺎﻗﯽ ﺳﺐ ﻧﮯ ﮨﻨﮕﺎﻣﮧ ﻣﭽﺎ ﺩﯾﺎ۔ ﮨﺎﮞ ﺁﭖ ﮐﻮ ﻋﻨﺎ ﮨﯽ ﭘﯿﺎﺭﯼ ﻟﮕﮯ ﮔﯽ ﮨﻢ ﺳﺐ ﮐﺴﯽ ﮐﮭﺎﺗﮯ ﻣﯿﮟ ﮨﯽ ﻧﮩﯿﮟ۔ ﻃﯿﺒﮧ ﺑﯿﮕﻢ ﺍﻭﺭ ہاﺭﻭﻥ ﺻﺎﺣﺐ ﺍﻧﮭﯿﮟ ﻟﮍﺗﺎ ﺩﯾﮑﮫ ﮐﺮ ﻣﺴﮑﺮﺍﻧﮯ ﻟﮕﮯ۔ﯾﮧ ﺑﺎﺕ ﻭﮦ ﺑﮭﯽ ﺟﺎﻧﺘﮯ ﺗﮭﮯ ﮐﮧ ﺭﻭﺣﺎﻥ ﺍﻭﺭ ﻋﻨﺎﯾﮧ ﺍﯾﮏ ﺩﻭﺳﺮﮮ ﮐﮯ ﻗﺮﯾﺐ ﮨﯿﮟ۔ﺍﻭﺭ ﺍﭼﮭﮯ ﮐﺰﻥ ﮨﯿﮟ۔

"ﺭﻭﺣﺎﻥ ﭘﺮﺳﻮﮞ ﺗﻢ ﭼﻠﮯ ﺟﺎﻭ ﮔﮯ"۔ ﻋﻨﺎﯾﮧ ﮐﮯ ﻟﺌﮯ ﯾﮧ ﺳﻮﭼﻨﺎ ﮨﯽ ﺗﮑﻠﯿﻒ ﺩﮦ ﺗﮭﺎ ﮐﮧ ﺭﻭﺣﺎﻥ ﭼﻼ ﺟﺎﺋﮯ ﮔﺎ۔ ﺍﺳﮯ ﯾﻮﮞ ﻟﮓ ﺭﯾﺎ ﺗﮭﺎ جیسے ﺑﺎﺑﺎﺟﺎﻧﯽ ﮐﺎ ﺑﺎﺯﻭ ﺍﻥ ﺳﮯ ﺍﻟﮓ ﮨﻮ ﺭﮨﺎ ﮨﮯ۔ ﺩﻭﺳﺮﺍ ﺭﻭﺣﺎﻥ ﻧﮯﺍﺳﮯ ﺑﮩﺖ ﮐﭽﮫ ﺩﯾﺎ ﻋﺰﺕ، ﻣﺎﻥ ﺩﻭﺳﺘﯽ۔ﮨﺮ ﻭﮦ ﺑﺎﺕ ﺭﻭﺣﺎﻥ ﻧﮯ ﭼﮭﻮﮌ ﺩﯼ ﺗﮭﯽ ﺟﻮ ﻋﻨﺎﯾﮧ ﮐﻮ ﻧﺎﭘﺴﻨﺪ ﺗﮭﯽ۔ ﺭﻭﺣﺎﻥ ﺧﻮﺩ بھی ﻋﺠﯿﺐ ﺳﯽ ﮐﯿﻔﯿﺖﮐﺎ ﺷﮑﺎﺭ ﺗﮭﺎ۔ ﺍﺳﮯ ﮔﮭﺮ ﺟﺎﻧﮯ ﮐﯽ ﮐﻮﺋﯽ ﺧﻮﺷﯽ ﻣﺤﺴﻮﺱ ﻧﮩﯿﮟ ﮨﻮ ﺭﮨﯽ ﺗﮭﯽ۔ ﺩﻝ ﻣﯿﮟ ﻋﺠﯿﺐ ﺳﺎ ﺑﻮﺟﮭﻞﭘﻦ ﺗﮭﺎ۔ ﺳﺐ ﺳﮯ ﺯﯾﺎﺩﮦ ﺍﺳﮯ ﻋﻨﺎﯾﮧ ﺳﮯ ﺩﻭﺭ ﺟﺎﻧﮯ ﮐﺎ ﺩﮐﮫ ﺗﮭﺎ ﺟﺲ ﮐﺎ ﻭﮦ ﺑﮯﺣﺪ ﻋﺎﺩﯼ ﮨﻮﮔﯿﺎ ﺗﮭﺎ۔ ﺟﺲ ﺩﻥ ﺭﻭﺣﺎﻥ ﮐﮯ ﭨﮑﭧ ﺗﮭﮯ ﺍﺱ ﺭﺍﺕ ﺳﺐ ﻧﮯ ﺟﺎﮒ ﮐﺮ ﻋﻨﺎﯾﮧ ﮐﮯ ﺭﻭﻡ ﻣﯿﮟ ﮔﺰﺍﺭﯼ۔ ﻧﮧ ﻋﻨﺎﯾﮧ ﮐﭽﮫ ﺑﻮﻝ ﺭﮨﯽ ﺗﮭﯽ ﻧﮧ ﺭﻭﺣﺎﻥ۔

"ﺍﺭﮮ ﺭﻭﺣﺎﻥ ﺑﮭﯿﺎ ﺁﭖ ﺗﻮ ﺍﯾﺴﮯ ﻏﻤﺰﺩﮦ ﮨﯿﮟ ﺟﯿﺴﮯ ﺁﭖ ﺍﭘﻨﮯ ﮔﮭﺮ ﻧﮩﯿﮟ ﮐﮩﯿﮟ ﺩﻭﺭ ﭘﺎﺭ ﻣﻠﮏ ﺟﺎ ﺭﮨﮯ ﮨﯿﮟ"۔ ﺭﻭﺣﺎﻥ ﻋﻠﯿﺰﮮ ﮐﯽ ﺑﺎﺕ ﭘﺮ ﻣﺴﮑﺮﺍ ﺩﯾﺎ۔ 

"ﻣﯿﮟ ﺑﯽﺟﺎﻥ ﺍﻭﺭ ﺍﺑﻮ ﺳﮯ ﮐﮩﻮﮞ ﮔﺎ ﺣﯿﺪﺭﺁﺑﺎﺩ ﺷﻔﭧ ہوﺟﺎﺋﯿﮟ ﻭﮦ ﻣﯿﺮﯼ ﺑﺎﺕ ﻧﮩﯿﮟ ﭨﺎﻟﯿﮟ ﮔﮯ ﭘﮭﺮ ہم ﺳﺐ ﻣﻞ ﮐﺮ ﺭﮨﯿﮟ ﮔﮯ". ﺭﻭﺣﺎﻥ ﻧﮯ ﺍﮎ ﻋﺰﻡ ﮐﮯ ﺳﺎﺗﮫ ﻋﻠﯿﺰﮮ ﺳﮯ ﮐﮩﺎ۔ ﺍﺳﮯ ﯾﻘﯿﻦ ﺗﮭﺎ ﺑﯽﺟﺎﻥ ﺍﻭﺭ ﺍﺑﻮ ﺍﺳﮑﯽ ﺑﺎﺕ ﺿﺮﻭﺭ ﻣﺎﻧﯿﮟ ﮔﮯ۔ ﺍﺳﮯ ﭘﺘﺎ ﻧﮩﯿﮟ ﺗﮭﺎ ﻗﺴﻤﺖ ﻟﮑﮭﻨﮯ ﻭﺍﻟﮯ ﻧﮯ ﺍﺳﮑﯽ ﺳﻮﭼﻮﮞ ﺳﮯ ﮐﺘﻨﺎ ﺍﻟﮓ ﺳﻮﭺ ﺭﮐﮭﺎ ﮨﮯ۔

********

جاری ہے۔